jaan yun libas-e-jism ko nikli utar kar

jaañ yuuñ libās-e-jism ko niklī utaar kar

jaise koī sarā.e meñ ik shab guzār kar

hālāt ne libās to melā kiyā magar

kirdār phir bhī rakkhā hai ham ne sañvār kar

me.aar āj-kal to baḌā.ī kā hai yahī

apnī har ek baat ko tū ishtihār kar

gar ho sake to de unheñ ummīd kī kiran

baiThe hoñ zindagānī se apnī jo haar kar

duniyā bahut baḌī hai kahīñ kar talāsh-e-rizq

hālāt kuchh hoñ in pe na ab inhisār kar

ye bhī to hai anā ko kuchalne kā ek taur

nafrat rahī hai jis se usī ko tū pyaar kar

jo zaḳhm dushmanoñ se mile un ko tū na dekh

jo dostoñ ne baḳhshe haiñ un kā shumār kar

ummīd roz ek na.ī le ke jāgiye

nākāmiyoñ ke bojh ko sar se utaar kar

har koī āñsuoñ kī zabāñ jāntā nahīñ

āñkheñ kisī ke sāmne mat ābshār kar

apne nahīñ to aur kisī ke liye bhī jī

'ḳhālid' ravish ik aisī bhī ab iḳhtiyār kar

jaan yun libas-e-jism ko nikli utar kar

jaise koi sarae mein ek shab guzar kar

haalat ne libas to mela kiya magar

kirdar phir bhi rakkha hai hum ne sanwar kar

mear aaj-kal to baDai ka hai yahi

apni har ek baat ko tu ishtihaar kar

gar ho sake to de unhen ummid ki kiran

baiThe hon zindagani se apni jo haar kar

duniya bahut baDi hai kahin kar talash-e-rizq

haalat kuchh hon in pe na ab inhisar kar

ye bhi to hai ana ko kuchalne ka ek taur

nafrat rahi hai jis se usi ko tu pyar kar

jo zaKHm dushmanon se mile un ko tu na dekh

jo doston ne baKHshe hain un ka shumar kar

ummid roz ek nai le ke jagiye

nakaamiyon ke bojh ko sar se utar kar

har koi aansuon ki zaban jaanta nahin

aankhen kisi ke samne mat aabshaar kar

apne nahin to aur kisi ke liye bhi ji

'KHalid' rawish ek aisi bhi ab iKHtiyar kar