jaane de Tuk chaman mein mujhe ai saba sarak

jaane de Tuk chaman meñ mujhe ai sabā sarak

kyuuñ chheḌtī hai tū mujhe nā-āshnā sarak

jaise añdherī raat meñ bijlī chamak ga.ī

us ruḳh se shab ga.ī jo vo zulf-e-dotā sarak

āsār-e-marg mujh meñ huvaidā hue magar

jab paas se ga.e mire sab āshnā sarak

kahtā hai vaqt-e-naza.a marīz us kā us se yuuñ

lagne de merī aañkh tū is dam zarā sarak

mayyat se merī guzre hai jis dam vo ba.ad-e-qatl

lāsha kahe hai ḳhuun se dāman bachā sarak

poroñ pe Dore bāñdhe haiñ us par shu.ūr ne

tā us ke funduqoñ kī na jaave hinā sarak

shab iḳhtilāt se vo mire kyā ḳhafā huā

had se ga.ī ziyāda jo añgusht-e-pā sarak

dhaḌke hai be-tarah se ye pahlū meñ raat din

Dartā huuñ zaḳhm-e-dil kī na jaave davā sarak

karne de mere ḳhuun ko ārām ḳhaak meñ

ai shor-e-hashr us ko abhī mat jagā sarak

ye kyā ġhazab huā ki na ḳhanjar lagā na tiir

pahlū se aaphī aap mirā dil gayā sarak

ḳhvāb-e-adam se maiñ abhī chauñkā huuñ duur ho

ai sub.h-e-ġham na apnā mujhe muñh dikhā sarak

pīchhe mire paḌā hai tū kyuuñ ghar kī raah le

rusvā kare gā kyā mujhe bahr-e-ḳhudā sarak

kyā be-hayā hai jo nahīñ Taltā tū 'mus.hafī'

sau baar maiñ ne tujh ko divāne kahā sarak

jaane de Tuk chaman mein mujhe ai saba sarak

kyun chheDti hai tu mujhe na-ashna sarak

jaise andheri raat mein bijli chamak gai

us ruKH se shab gai jo wo zulf-e-dota sarak

aasar-e-marg mujh mein huwaida hue magar

jab pas se gae mere sab aashna sarak

kahta hai waqt-e-naza mariz us ka us se yun

lagne de meri aankh tu is dam zara sarak

mayyat se meri guzre hai jis dam wo baad-e-qatl

lasha kahe hai KHun se daman bacha sarak

poron pe Dore bandhe hain us par shuur ne

ta us ke funduqon ki na jawe hina sarak

shab iKHtilat se wo mere kya KHafa hua

had se gai ziyaada jo angusht-e-pa sarak

dhaDke hai be-tarah se ye pahlu mein raat din

Darta hun zaKHm-e-dil ki na jawe dawa sarak

karne de mere KHun ko aaram KHak mein

ai shor-e-hashr us ko abhi mat jaga sarak

ye kya ghazab hua ki na KHanjar laga na tir

pahlu se aaphi aap mera dil gaya sarak

KHwab-e-adam se main abhi chaunka hun dur ho

ai subh-e-gham na apna mujhe munh dikha sarak

pichhe mere paDa hai tu kyun ghar ki rah le

ruswa kare ga kya mujhe bahr-e-KHuda sarak

kya be-haya hai jo nahin Talta tu 'mushafi'

sau bar main ne tujh ko diwane kaha sarak