jaane kis daur ki saza hun main

jaane kis daur kī sazā huuñ maiñ

ibtidā huuñ ki intihā huuñ maiñ

apnī dhaḌkan se kar mujhe mahsūs

sirf sāñsoñ kā silsila huuñ maiñ

TūTnā hī mirā muqaddar hai

ḳhvāb huuñ yā ki aa.ina huuñ maiñ

mujh ko sun le qubūl bhī kar le

ek nannhī sī iltijā huuñ maiñ

zindagī se ajal ke dāman tak

chand lamhoñ kā fāsla huuñ maiñ

koī jhoñkā miTā na paayā jise

naam vo ret pe likhā huuñ maiñ

zindagī mujh se haar jā.egī

āzmā.ish kī intihā huuñ maiñ

mujh se qaa.em hai raunaq-e-hastī

ḳhud kī hastī se hī ḳhafā huuñ maiñ

ab jo soyā to so hī jā.ūñgā

umr bhar jāgtā rahā huuñ maiñ

jism kī qaid meñ rahā huuñ kabhī

aur kabhī jism se rihā huuñ maiñ

jaane kis daur ki saza hun main

ibtida hun ki intiha hun main

apni dhaDkan se kar mujhe mahsus

sirf sanson ka silsila hun main

TuTna hi mera muqaddar hai

KHwab hun ya ki aaina hun main

mujh ko sun le qubul bhi kar le

ek nannhi si iltija hun main

zindagi se ajal ke daman tak

chand lamhon ka fasla hun main

koi jhonka miTa na paya jise

nam wo ret pe likha hun main

zindagi mujh se haar jaegi

aazmaish ki intiha hun main

mujh se qaem hai raunaq-e-hasti

KHud ki hasti se hi KHafa hun main

ab jo soya to so hi jaunga

umr bhar jagta raha hun main

jism ki qaid mein raha hun kabhi

aur kabhi jism se riha hun main