jaane kya baat hai hanste hoi Dar jate hain

jaane kyā baat hai hañste hoī Dar jaate haiñ

chalte chalte hue raste meñ Thahar jaate haiñ

mārne ke liye hathiyār zarūrī to nahīñ

ham to ehsās kī shiddat se hī mar jaate haiñ

naam ke apnoñ ne tā-umr kiyā hai rusvā

ab to Darte hue ham apne bhī ghar jaate haiñ

ye alag baat ki ham ḳhud hī farāmosh kareñ

kaun kahtā hai ki hālāt sañvar jaate haiñ

yuuñ na maġhrūr ho tū apnī masīhā.ī par

zaḳhm kī rasm hai ik roz ye bhar jaate haiñ

jhuuT kā saath na dene kī qasam khaa.ī thī

phir bhī tere liye ham sach se mukar jaate haiñ

kyā qayāmat kā ye ahvāl tujhe yaad nahīñ

ruuī ke gaal se patthar bhī bikhar jaate haiñ

lafz ke khel meñ māhir the kabhī ham bhī magar

ab to sadiyoñ yūñhī ḳhāmosh guzar jaate haiñ

jo diye shab meñ jale un ko sambhālo 'mumtāz'

saare chaḌhte hue sūraj to utar jaate haiñ

jaane kya baat hai hanste hoi Dar jate hain

chalte chalte hue raste mein Thahar jate hain

marne ke liye hathiyar zaruri to nahin

hum to ehsas ki shiddat se hi mar jate hain

nam ke apnon ne ta-umr kiya hai ruswa

ab to Darte hue hum apne bhi ghar jate hain

ye alag baat ki hum KHud hi faramosh karen

kaun kahta hai ki haalat sanwar jate hain

yun na maghrur ho tu apni masihai par

zaKHm ki rasm hai ek roz ye bhar jate hain

jhuT ka sath na dene ki qasam khai thi

phir bhi tere liye hum sach se mukar jate hain

kya qayamat ka ye ahwal tujhe yaad nahin

rui ke gal se patthar bhi bikhar jate hain

lafz ke khel mein mahir the kabhi hum bhi magar

ab to sadiyon yunhi KHamosh guzar jate hain

jo diye shab mein jale un ko sambhaalo 'mumtaz'

sare chaDhte hue suraj to utar jate hain