jaane kya qimat-e-arbab-e-wafa Thahregi

jaane kyā qīmat-e-arbāb-e-vafā Thahregī

maiñ agar arz karūñgā to ḳhatā Thahregī

nok-e-nashtar se khilā.ī ga.iiñ kaliyāñ kitnī

jaane is shahr kī kyā āb-o-havā Thahregī

raqs-e-parvāna kī gardish jo thame āḳhir-e-shab

ahl-e-mahfil ke liye ye bhī adā Thahregī

aaj ke daur meñ vīrāne bhī ta.amīr hue

kal kī tahzīb ḳhudā jāniye kyā Thahregī

muddatoñ ba.ad kisī band darīche ke qarīb

kyā ḳhabar thī mirī raftār zarā Thahregī

tirī āvāz mire vāste sahrā kā sukūt

merī ḳhāmoshī rah-o-rasm-e-duā Thahregī

log rahte haiñ yahāñ ḳhālī makānoñ kī tarah

kis ke darvāza pe dastak kī sadā Thahregī

'shāz' idhar ḳhvāb ke dariyā pe milegā koī

ek parchhā.īñ sar-e-āb sunā Thahregī

jaane kya qimat-e-arbab-e-wafa Thahregi

main agar arz karunga to KHata Thahregi

nok-e-nashtar se khilai gain kaliyan kitni

jaane is shahr ki kya aab-o-hawa Thahregi

raqs-e-parwana ki gardish jo thame aaKHir-e-shab

ahl-e-mahfil ke liye ye bhi ada Thahregi

aaj ke daur mein virane bhi tamir hue

kal ki tahzib KHuda jaaniye kya Thahregi

muddaton baad kisi band dariche ke qarib

kya KHabar thi meri raftar zara Thahregi

teri aawaz mere waste sahra ka sukut

meri KHamoshi rah-o-rasm-e-dua Thahregi

log rahte hain yahan KHali makanon ki tarah

kis ke darwaza pe dastak ki sada Thahregi

'shaz' idhar KHwab ke dariya pe milega koi

ek parchhain sar-e-ab suna Thahregi