jaane kyon ab ye guman hone laga hai mujhko

jaane kyoñ ab ye gumāñ hone lagā hai mujh ko

jaise muddat se koī DhūñD rahā hai mujh ko

bol kis moḌ pe huuñ kashmakash-e-marg-o-hayāt

aise aalam meñ kahāñ chhoḌ diyā hai mujh ko

ḳhāna-zādān-e-ḳhirad kuchh to kareñ rāhbarī

ye junūñ jaane kidhar le ke gayā hai mujh ko

aisā lagtā hai ki ab to na bharegā tā-umr

zaḳhm jo ḳhvāb-e-shikasta ne diyā hai mujh ko

merī taqdīr meñ tahrīr hai tanha-safarī

ḳhud se shikva na koī tum se gila hai mujh ko

āshiyāñ shāḳh-e-havādis pe banāyā thā 'shamīm'

baad ik umr ye ma.alūm huā hai mujh ko

jaane kyon ab ye guman hone laga hai mujh ko

jaise muddat se koi DhunD raha hai mujh ko

bol kis moD pe hun kashmakash-e-marg-o-hayat

aise aalam mein kahan chhoD diya hai mujh ko

KHana-zadan-e-KHirad kuchh to karen rahbari

ye junun jaane kidhar le ke gaya hai mujh ko

aisa lagta hai ki ab to na bharega ta-umr

zaKHm jo KHwab-e-shikasta ne diya hai mujh ko

meri taqdir mein tahrir hai tanha-safari

KHud se shikwa na koi tum se gila hai mujh ko

aashiyan shaKH-e-hawadis pe banaya tha 'shamim'

baad ek umr ye malum hua hai mujh ko