jaane kyon mohabbat mein dilkashi nahin milti

jaane kyoñ mohabbat meñ dilkashī nahīñ miltī

dost roz milte haiñ dostī nahīñ miltī

zindagī agar chāho fāqa-mast ban jaao

roġhnī nivāloñ se zindagī nahīñ miltī

maslak-e-faqīrī meñ jo ḳhushī mayassar hai

taḳht-e-bādshāhī par vo ḳhushī nahīñ miltī

adh-khulī kalī shāyad bāġhbāñ ne phir toḌī

kyoñ guloñ ke chehroñ par tāzgī nahīñ miltī

un ko koī samjhā.e apnā jā.eza le leñ

jin ko apne sajdoñ meñ chāshnī nahīñ miltī

dil mirā añdhere meñ aaj bhī bhaTaktā hai

raushnī kī duniyā meñ raushnī nahīñ miltī

zard zard chehre haiñ ḳhauf-e-marg se 'ālam'

ab to koī bhī sūrat chāñd sī nahīñ miltī

jaane kyon mohabbat mein dilkashi nahin milti

dost roz milte hain dosti nahin milti

zindagi agar chaho faqa-mast ban jao

roghni niwalon se zindagi nahin milti

maslak-e-faqiri mein jo KHushi mayassar hai

taKHt-e-baadshahi par wo KHushi nahin milti

adh-khuli kali shayad baghban ne phir toDi

kyon gulon ke chehron par tazgi nahin milti

un ko koi samjhae apna jaeza le len

jin ko apne sajdon mein chashni nahin milti

dil mera andhere mein aaj bhi bhaTakta hai

raushni ki duniya mein raushni nahin milti

zard zard chehre hain KHauf-e-marg se 'alam'

ab to koi bhi surat chand si nahin milti