jaane wale tujhe kab dekh sakun bar-e-digar

jaane vaale tujhe kab dekh sakūñ bār-e-digar

raushnī aañkh kī bah jā.egī aañsū ban kar

tū hissar-e-dar-o-dīvār liye jaa.e kidhar

merā kyā hai ki maiñ huuñ dasht-ba-dil ḳhāna ba-sar

kaun jaane mirī tanhā.ī-pasandī kyā hai

bas tire zikr kā andesha tire naam kā Dar

yuuñ bhī ashkoñ kā dhundalkā thā sujhā.ī na diyā

kis ne luuTā dam-e-ruḳhsat sar-o-sāmān-e-safar

kis ne dekhā hai mirā shahr-e-ḳhamoshān-e-hayāt

dil kī vaadī se guzarnā hai to āhista guzar

ro rahā huuñ ki tire saath hañsā thā barsoñ

hañs rahā huuñ ki koī dekh na le dīda-e-tar

ye mirī zaḳhm-e-nasībī ye tirī hairānī

maiñ ne tere hī ishāra pe to Daalī thī sipar

TuuT jā.egā nasha dekh koī naam na le

aañkh bhar aa.egī is tarah mirā jaam na bhar

koī gum-gashta har āġhāz-e-safar se pahle

chuum letā hai tirī yaad kā bhārī patthar

maiñ ne har raat yahī soch ke aañsū poñchhe

muñh dikhānā bhī hai duniyā ko ba-hañgām-e-sahar

'shāz' ko sabr atā kar ke baḌā kaam kiyā

us ne kyā māñgā thā kyā paayā hai ai rabb-e-hunar

jaane wale tujhe kab dekh sakun bar-e-digar

raushni aankh ki bah jaegi aansu ban kar

tu hissar-e-dar-o-diwar liye jae kidhar

mera kya hai ki main hun dasht-ba-dil KHana ba-sar

kaun jaane meri tanhai-pasandi kya hai

bas tere zikr ka andesha tere nam ka Dar

yun bhi ashkon ka dhundalka tha sujhai na diya

kis ne luTa dam-e-ruKHsat sar-o-saman-e-safar

kis ne dekha hai mera shahr-e-KHamoshan-e-hayat

dil ki wadi se guzarna hai to aahista guzar

ro raha hun ki tere sath hansa tha barson

hans raha hun ki koi dekh na le dida-e-tar

ye meri zaKHm-e-nasibi ye teri hairani

main ne tere hi ishaara pe to Dali thi sipar

TuT jaega nasha dekh koi nam na le

aankh bhar aaegi is tarah mera jam na bhar

koi gum-gashta har aaghaz-e-safar se pahle

chum leta hai teri yaad ka bhaari patthar

main ne har raat yahi soch ke aansu ponchhe

munh dikhana bhi hai duniya ko ba-hangam-e-sahar

'shaz' ko sabr ata kar ke baDa kaam kiya

us ne kya manga tha kya paya hai ai rabb-e-hunar