jata raha qalb se sari KHudai ka ishq

jaatā rahā qalb se saarī ḳhudā.ī kā ishq

qābil-e-tārīf hai tere fidā.ī kā ishq

kaisī musībat hai ye gul ko ḳhamoshī kā shauq

bulbul-e-betāb ko harza-sarā.ī kā ishq

paḌ ga.ī bakne kī lat varna yahāñ tak na thā

vā.iz-e-nā-faham ko harza-sarā.ī kā ishq

kartā huuñ jo baar baar bosa-e-ruḳh kā savāl

husn ke sadqe se hai mujh ko gadā.ī kā ishq

tum ko ḳhudā ne diyā saarī ḳhudā.ī kā husn

mujh ko atā kar diyā saarī ḳhudā.ī kā ishq

āshiq o ma.ashūq kī haa.e nibhe kis tarah

un ko kudūrat kā shauq mujh ko safā.ī kā ishq

pūchh le 'parvīñ' se yā qais se daryāft kar

shahr meñ mash.hūr hai tere fidā.ī kā ishq

jata raha qalb se sari KHudai ka ishq

qabil-e-tarif hai tere fidai ka ishq

kaisi musibat hai ye gul ko KHamoshi ka shauq

bulbul-e-betab ko harza-sarai ka ishq

paD gai bakne ki lat warna yahan tak na tha

waiz-e-na-faham ko harza-sarai ka ishq

karta hun jo bar bar bosa-e-ruKH ka sawal

husn ke sadqe se hai mujh ko gadai ka ishq

tum ko KHuda ne diya sari KHudai ka husn

mujh ko ata kar diya sari KHudai ka ishq

aashiq o mashuq ki hae nibhe kis tarah

un ko kudurat ka shauq mujh ko safai ka ishq

puchh le 'parwin' se ya qais se daryaft kar

shahr mein mashhur hai tere fidai ka ishq