jate-jate gale ye gham paD jata hai

jāte-jāte gale ye ġham paḌ jaatā hai

achchhā-ḳhāsā banda kam paḌ jaatā hai

nāz-o-adā se chalne vaalā kyā jaane

dil kī zamīñ pe naqsh-e-qadam paḌ jaatā hai

sunte haiñ mazlūm kī āh-o-zārī se

zālim kī taqdīr meñ ḳham paḌ jaatā hai

chāhe jitnā bhī sāmān kiyā jaa.e

kuchh na kuchh to phir bhī kam paḌ jaatā hai

shāmil ho jab tere lahje meñ talḳhī

yuuñ lagtā hai shahd meñ sam paḌ jaatā hai

chalne lagtī hai jab baat mohabbat kī

biich meñ koī ahl-e-sitam paḌ jaatā hai

jate-jate gale ye gham paD jata hai

achchha-KHasa banda kam paD jata hai

naz-o-ada se chalne wala kya jaane

dil ki zamin pe naqsh-e-qadam paD jata hai

sunte hain mazlum ki aah-o-zari se

zalim ki taqdir mein KHam paD jata hai

chahe jitna bhi saman kiya jae

kuchh na kuchh to phir bhi kam paD jata hai

shamil ho jab tere lahje mein talKHi

yun lagta hai shahd mein sam paD jata hai

chalne lagti hai jab baat mohabbat ki

bich mein koi ahl-e-sitam paD jata hai