jab aae chand harf-e-shikayat zaban par

jab aa.e chand harf-e-shikāyat zabān par

nāloñ kā shor jaane lagā āsmān par

aaya mizāj-e-yār agar imtihān par

ham kushtagān-e-zauq haiñ kheleñge jaan par

ik gard-bād-e-ḳhāk kā naqsha hai zindagī

goyā ki haiñ zamīñ pe na ham āsmān par

hālāñki be-zabān haiñ naqsh-e-qadam kī tarh

lekin miTe hue haiñ tumhāre bayān par

muddat huī ki ham sū-e-sahrā nahīñ ga.e

vīrān ab hamārī jagah hai makān par

josh-e-sharāb-e-ishq hai aur shauq-e-jān hai

ham be-ḳhudī meñ khel hī jā.eñge jaan par

ham jānte haiñ vāda-e-mauhūm ko magar

qurbān kar rahe haiñ yaqīñ ko gumān par

kyā is jahān se hai ziyāda vahāñ kā lutf

marte haiñ log saikḌoñ kyoñ us jahān par

dushman hai barq-o-bād to dushman hai bāġhbāñ

kyā kyā sitam haiñ chand asīroñ kī jaan par

phailā huā hai qissa-e-mansūr har taraf

zinhār rāz-e-dost na aa.e zabān par

ai ḳhāk-e-gor itne na de ranj be-shumār

kartā nahīñ hai koī jafā mehmān par

'mas.ūd' rāst-bāz vo samjheñge kis tarah

jab hai yaqīñ daroġh kā tere bayān par

jab aae chand harf-e-shikayat zaban par

nalon ka shor jaane laga aasman par

aaya mizaj-e-yar agar imtihan par

hum kushtagan-e-zauq hain khelenge jaan par

ek gard-baad-e-KHak ka naqsha hai zindagi

goya ki hain zamin pe na hum aasman par

haalanki be-zaban hain naqsh-e-qadam ki tarh

lekin miTe hue hain tumhaare bayan par

muddat hui ki hum su-e-sahra nahin gae

viran ab hamari jagah hai makan par

josh-e-sharab-e-ishq hai aur shauq-e-jaan hai

hum be-KHudi mein khel hi jaenge jaan par

hum jaante hain wada-e-mauhum ko magar

qurban kar rahe hain yaqin ko guman par

kya is jahan se hai ziyaada wahan ka lutf

marte hain log saikDon kyon us jahan par

dushman hai barq-o-baad to dushman hai baghban

kya kya sitam hain chand asiron ki jaan par

phaila hua hai qissa-e-mansur har taraf

zinhaar raaz-e-dost na aae zaban par

ai KHak-e-gor itne na de ranj be-shumar

karta nahin hai koi jafa mehman par

'masud' rast-baz wo samjhenge kis tarah

jab hai yaqin darogh ka tere bayan par