jab aasman zamin par utarne lagta hai

jab āsmān zamīñ par utarne lagtā hai

to zindagī kā tasavvur bikharne lagtā hai

kured letā huuñ tere ḳhayāl se aksar

tirī vafā kā agar zaḳhm bharne lagtā hai

jise fareb milā ho vafāoñ ke badle

vo shaḳhs apne hī saa.e se Darne lagtā hai

maiñ jab simaTtā huuñ hālāt kī panāhoñ meñ

mirā vujūd-e-shikasta bikharne lagtā hai

zamāna kyuuñ na mirī raah kī rukāvaT ho

mirā junūñ bhī to had se guzarne lagtā hai

uḌaan bhartā huuñ jab bhī ḳhalāoñ se aage

na jaane kaun mire par katarne lagtā hai

qadam baḌhātā huuñ 'sālim' hayāt kī jānib

to mere paañv meñ rasta Thaharne lagtā hai

jab aasman zamin par utarne lagta hai

to zindagi ka tasawwur bikharne lagta hai

kured leta hun tere KHayal se aksar

teri wafa ka agar zaKHm bharne lagta hai

jise fareb mila ho wafaon ke badle

wo shaKHs apne hi sae se Darne lagta hai

main jab simaTta hun haalat ki panahon mein

mera wujud-e-shikasta bikharne lagta hai

zamana kyun na meri rah ki rukawaT ho

mera junun bhi to had se guzarne lagta hai

uDan bharta hun jab bhi KHalaon se aage

na jaane kaun mere par katarne lagta hai

qadam baDhata hun 'salim' hayat ki jaanib

to mere panw mein rasta Thaharne lagta hai