jab apni zat ko samjha to koi Dar na raha

jab apnī zaat ko samjhā to koī Dar na rahā

jahāñ meñ koī parastār-e-ahl-e-zar na rahā

saḌak ke kāñTe ki jin par lahū ke chhīñTe haiñ

batā rahe haiñ ki ik shaḳhs raat ghar na rahā

badaltī qadroñ meñ ḳhūn-e-jigar se nāma-e-shauq

ye ḳhaas tarz-e-nigārish bhī mo'atabar na rahā

nigāh-e-nāz hai māyūs kis taraf jaa.e

vo ahl-e-dil na rahe halqa-e-asar na rahā

ḳhushī ke lamhoñ se kaif-e-davām kyā miltā

vo raqs-e-jām bhī dekhā jo raat bhar na rahā

lachak thī jin meñ vo paude to ab bhī baaqī haiñ

havā kī zad pe jo aayā vahī shajar na rahā

zarā sī der meñ manzil ko pā liyā us ne

vo jis ke sar pe kahīñ sāya-e-shajar na rahā

ḳhirad kā dil se ta.alluq na koī rishta hai

vo ham-ḳhayāl bhī kab thā jo ham-safar na rahā

jab apni zat ko samjha to koi Dar na raha

jahan mein koi parastar-e-ahl-e-zar na raha

saDak ke kanTe ki jin par lahu ke chhinTe hain

bata rahe hain ki ek shaKHs raat ghar na raha

badalti qadron mein KHun-e-jigar se nama-e-shauq

ye KHas tarz-e-nigarish bhi mo'atabar na raha

nigah-e-naz hai mayus kis taraf jae

wo ahl-e-dil na rahe halqa-e-asar na raha

KHushi ke lamhon se kaif-e-dawam kya milta

wo raqs-e-jam bhi dekha jo raat bhar na raha

lachak thi jin mein wo paude to ab bhi baqi hain

hawa ki zad pe jo aaya wahi shajar na raha

zara si der mein manzil ko pa liya us ne

wo jis ke sar pe kahin saya-e-shajar na raha

KHirad ka dil se talluq na koi rishta hai

wo ham-KHayal bhi kab tha jo ham-safar na raha