jab baDhenge ba-qasd-e-yakjai

jab baḌheñge ba-qasd-e-yakjā.ī

ham jabhī ban sakeñge ikkā.ī

raushnī jā chhupī hai āñkhoñ meñ

tīrgī qalb meñ utar aa.ī

aap se kaun māñgtā hai javāb

karte rahiye qayās-ārā.ī

aaj had se sivā hai bechainī

uf re ehsās-e-dard-e-tanhā.ī

umr bhar moḌ moḌ saath diyā

ai ḳhud-āgāh yād-e-rusvā.ī

yaad hai ḳhizr-e-vaqt jab ham ko

har sadā thī sadā-e-shahnā.ī

log socheñge tujh ko tere baad

naap har zaḳhm-e-dil kī gahrā.ī

ab kahāñ tujh ko DhūñDne jaa.eñ

ho chukī ham se arsh-paimā.ī

jaane kyoñ ye ḳhayāl aatā hai

tum tamāsha ho ham tamāshā.ī

jaise āvāra-gard ham haiñ 'shamīm'

haiñ usī tarah aap sahrā.ī

jab baDhenge ba-qasd-e-yakjai

hum jabhi ban sakenge ikkai

raushni ja chhupi hai aankhon mein

tirgi qalb mein utar aai

aap se kaun mangta hai jawab

karte rahiye qayas-arai

aaj had se siwa hai bechaini

uf re ehsas-e-dard-e-tanhai

umr bhar moD moD sath diya

ai KHud-agah yaad-e-ruswai

yaad hai KHizr-e-waqt jab hum ko

har sada thi sada-e-shahnai

log sochenge tujh ko tere baad

nap har zaKHm-e-dil ki gahrai

ab kahan tujh ko DhunDne jaen

ho chuki hum se arsh-paimai

jaane kyon ye KHayal aata hai

tum tamasha ho hum tamashai

jaise aawara-gard hum hain 'shamim'

hain usi tarah aap sahrai