jab bhi dekhe wabaal karti hai

jab bhī dekhe vabāl kartī hai

aañkh us kī kamāl kartī hai

aa.ina ġhaur jab nahīñ kartā

muflisī tab savāl kartī hai

āshiqī kā mizāj rab jaane

jiinā marnā muhāl kartī hai

dāstāneñ vajūd pātīñ haiñ

naujavānī kamāl kartī hai

ruuh ko nazr karnā paḌtā hai

maut jis dam savāl kartī hai

bas tasavvur meñ aa ke terī hañsī

sur ko lai lai ko taal kartī hai

jab bhī aatī hai hijr kī saa.at

dil ke shīshe meñ baal kartī hai

bas tirī yaad din ke Dhalte hī

mujh ko har shab niDhāl kartī hai

terī ulfat kā hai tufail 'vasīm'

mujh ko jo be-misāl kartī hai

jab bhi dekhe wabaal karti hai

aankh us ki kamal karti hai

aaina ghaur jab nahin karta

muflisi tab sawal karti hai

aashiqi ka mizaj rab jaane

jina marna muhaal karti hai

dastanen wajud patin hain

naujawani kamal karti hai

ruh ko nazr karna paDta hai

maut jis dam sawal karti hai

bas tasawwur mein aa ke teri hansi

sur ko lai lai ko tal karti hai

jab bhi aati hai hijr ki saat

dil ke shishe mein baal karti hai

bas teri yaad din ke Dhalte hi

mujh ko har shab niDhaal karti hai

teri ulfat ka hai tufail 'wasim'

mujh ko jo be-misal karti hai