jab bhi hui tamir-e-nasheman barq-e-tapan tak baat gai

jab bhī huī ta.amīr-e-nasheman barq-e-tapāñ tak baat ga.ī

aag lagī jab shāḳh-e-chaman meñ apne makāñ tak baat ga.ī

zikr-e-lab-o-ruḳhsār se aksar TuuT gayā gulchīñ kā bharam

baat chalī thī ġhuncha-o-gul kī aur ḳhizāñ tak baat ga.ī

un ke gunāh-o-jurm-o-ḳhatā par qad-āvar ḳhāmosh rahe

ham se zarā sī chuuk huī to ḳhurd-o-kalāñ tak baat ga.ī

kaisī vafā.eñ kaisā va.ada kis kis par ilzām dhareñ

zikr chhiḌā jab shahr-e-sitam kā kū-e-butāñ tak baat ga.ī

māh-ruḳhoñ meñ charchā thā kal us kī jabīn-e-raushan kā

arz-o-samā se bāhar niklī kāhkashāñ tak baat ga.ī

jab bhi hui tamir-e-nasheman barq-e-tapan tak baat gai

aag lagi jab shaKH-e-chaman mein apne makan tak baat gai

zikr-e-lab-o-ruKHsar se aksar TuT gaya gulchin ka bharam

baat chali thi ghuncha-o-gul ki aur KHizan tak baat gai

un ke gunah-o-jurm-o-KHata par qad-awar KHamosh rahe

hum se zara si chuk hui to KHurd-o-kalan tak baat gai

kaisi wafaen kaisa wada kis kis par ilzam dharen

zikr chhiDa jab shahr-e-sitam ka ku-e-butan tak baat gai

mah-ruKHon mein charcha tha kal us ki jabin-e-raushan ka

arz-o-sama se bahar nikli kahkashan tak baat gai