jab bhi qissa apna paDhna

jab bhī qissa apnā paḌhnā

pahle chehra chehrā paḌhnā

tanhā.ī kī dhuup meñ tum bhī

baiTh ke apnā saayā paḌhnā

āvāzoñ ke shahar meñ rah kar

siikh gayā huuñ lahja paḌhnā

har koñpal kā haal likhā hai

shāḳh kā piilā pattā paḌhnā

bhej ke naama yaad dilā do

bhuul gayā huuñ likhnā paḌhnā

logo merī pyaas kā qissa

sadiyoñ dariyā dariyā paḌhnā

dīvāroñ par kuchh likkhā hai

tum bhī apnā kūcha paḌhnā

maazī kā ā.īna rakh kar

ḳhud ko thoḌā thoḌā paḌhnā

maiñ huuñ sañg-e-mīl kī sūrat

mujh se merā rastā paḌhnā

ziist kā matlab kyā hai 'kāzim'

apnā apnā likhnā paḌnā

jab bhi qissa apna paDhna

pahle chehra chehra paDhna

tanhai ki dhup mein tum bhi

baiTh ke apna saya paDhna

aawazon ke shahar mein rah kar

sikh gaya hun lahja paDhna

har konpal ka haal likha hai

shaKH ka pila patta paDhna

bhej ke nama yaad dila do

bhul gaya hun likhna paDhna

logo meri pyas ka qissa

sadiyon dariya dariya paDhna

diwaron par kuchh likkha hai

tum bhi apna kucha paDhna

mazi ka aaina rakh kar

KHud ko thoDa thoDa paDhna

main hun sang-e-mil ki surat

mujh se mera rasta paDhna

zist ka matlab kya hai 'kazim'

apna apna likhna paDna