jab bhi sine mein kisi but ko sajaya humne

jab bhī siine meñ kisī but ko sajāyā ham ne

ik hijāb aap ke chehre se uThāyā ham ne

naam lene se tirā baaz na aayā phir bhī

dil-e-kambaḳht ko samjhāyā bujhāyā ham ne

terī tasvīr pe kuchh soch ke aksar apnā

naam likh likh ke ka.ī baar miTāyā ham ne

ek ehsās kī bandish ke sivā kuchh bhī nahīñ

aap ke pyaar se is raaz ko paayā ham ne

kabhī is dil ke varaq par jo likhī thī tahrīr

terā ḳhat paḌh ke use aaj miTāyā ham ne

aaj kis darja bulandī pe hai qismat apnī

aap kī bazm meñ dil apnā jalāyā ham ne

'rāje' ham kis se kaheñ kaun sunegā fariyād

is jahāñ meñ koī insān na paayā ham ne

jab bhi sine mein kisi but ko sajaya hum ne

ek hijab aap ke chehre se uThaya hum ne

nam lene se tera baz na aaya phir bhi

dil-e-kambaKHt ko samjhaya bujhaya hum ne

teri taswir pe kuchh soch ke aksar apna

nam likh likh ke kai bar miTaya hum ne

ek ehsas ki bandish ke siwa kuchh bhi nahin

aap ke pyar se is raaz ko paya hum ne

kabhi is dil ke waraq par jo likhi thi tahrir

tera KHat paDh ke use aaj miTaya hum ne

aaj kis darja bulandi pe hai qismat apni

aap ki bazm mein dil apna jalaya hum ne

'raje' hum kis se kahen kaun sunega fariyaad

is jahan mein koi insan na paya hum ne