jab dard ki shaMein jalti hain ehsas ke nazuk sine mein

jab dard kī sham.eñ jaltī haiñ ehsās ke nāzuk siine meñ

ik husn sā shāmil hotā hai phir tanhā tanhā jiine meñ

kuchh lutf kī garmī kī ḳhātir kuchh jān-e-vafā ke sadqe meñ

gesū-e-alam ke saa.e meñ rāhat sī milī hai piine meñ

āġhosh-e-tamannā chhū aa.eñ jab zulf-e-yār kī ḳhushbū meñ

āñkhoñ meñ sāvan lahrāyā dīpak sā sulgā siine meñ

mausīqī-e-husn kī maujeñ thī kuchh āñkhoñ meñ kuchh pyāloñ meñ

jo sāhil-e-dil tak ho aa.eñ yādoñ ke ek safīne meñ

palkoñ meñ sulagte tāroñ se maiñ raat kī afshāñ chun na sakā

sho.aloñ ko chhupā.e phirtā huuñ maiñ dil ke ek nagīne meñ

vo rañg-e-hayā ehsās-e-tarab ā.īna-e-ruḳh ke aks-fagan

ik tābish tere chehre kī ik aañch sī mere siine meñ

kaliyoñ ne ghūñghaT sarkā.e shabnam ne motī rol diye

lazzat sī milī hai ashkoñ se ye chaak jigar kā siine meñ

naġhmoñ kī chāñdnī chhiTkī hai sheroñ ke shabistāñ mahke haiñ

phir sāz-e-ġhazal le aayā huuñ ik lutf hai aksar jiine meñ

jab dard ki shamen jalti hain ehsas ke nazuk sine mein

ek husn sa shamil hota hai phir tanha tanha jine mein

kuchh lutf ki garmi ki KHatir kuchh jaan-e-wafa ke sadqe mein

gesu-e-alam ke sae mein rahat si mili hai pine mein

aaghosh-e-tamanna chhu aaen jab zulf-e-yar ki KHushbu mein

aankhon mein sawan lahraya dipak sa sulga sine mein

mausiqi-e-husn ki maujen thi kuchh aankhon mein kuchh pyalon mein

jo sahil-e-dil tak ho aaen yaadon ke ek safine mein

palkon mein sulagte taron se main raat ki afshan chun na saka

shoalon ko chhupae phirta hun main dil ke ek nagine mein

wo rang-e-haya ehsas-e-tarab aaina-e-ruKH ke aks-fagan

ek tabish tere chehre ki ek aanch si mere sine mein

kaliyon ne ghunghaT sarkae shabnam ne moti rol diye

lazzat si mili hai ashkon se ye chaak jigar ka sine mein

naghmon ki chandni chhiTki hai sheron ke shabistan mahke hain

phir saz-e-ghazal le aaya hun ek lutf hai aksar jine mein