jab jawani nahin to phir kya hai

jab javānī nahīñ to phir kyā hai

zindagānī nahīñ to phir kyā hai

nazm vasf-e-dahan jo kartā huuñ

ġhaib-dānī nahīñ to phir kyā hai

huur ke zikr par bigaḌte ho

bad-gumānī nahīñ to phir kyā hai

ḳhuub dekhī shabīh yūsuf kī

naqsh-e-sānī nahīñ to phir kyā hai

ḳhush-navāyān-e-bāġh-o-kunj-e-qafas

dāna-pānī nahīñ to phir kyā hai

naaz uThte nahīñ hasīnoñ ke

nā-tavānī nahīñ to phir kyā hai

dī jagah mujh ko apne pahlū meñ

mehrbānī nahīñ to phir kyā hai

arinī kā javāb ai muusā

lan-tarānī nahīñ to phir kyā hai

dil-e-muztar meñ daaġh chhalle kā

ye nishānī nahīñ to phir kyā hai

ho pareshān mujh se ḳhalvat meñ

bad-gumānī nahīñ to phir kyā hai

ātish-e-tar ko dekh ai vaa.iz

aag paanī nahīñ to phir kyā hai

tire saaqī safed siine meñ

arġhavānī nahīñ to phir kyā hai

tū sune tuur par kalīm kī baat

ḳhush-bayānī nahīñ to phir kyā hai

zindagī jis ko log kahte haiñ

'badr' faanī nahīñ to phir kyā hai

jab jawani nahin to phir kya hai

zindagani nahin to phir kya hai

nazm wasf-e-dahan jo karta hun

ghaib-dani nahin to phir kya hai

hur ke zikr par bigaDte ho

bad-gumani nahin to phir kya hai

KHub dekhi shabih yusuf ki

naqsh-e-sani nahin to phir kya hai

KHush-nawayan-e-bagh-o-kunj-e-qafas

dana-pani nahin to phir kya hai

naz uThte nahin hasinon ke

na-tawani nahin to phir kya hai

di jagah mujh ko apne pahlu mein

mehrbani nahin to phir kya hai

arini ka jawab ai musa

lan-tarani nahin to phir kya hai

dil-e-muztar mein dagh chhalle ka

ye nishani nahin to phir kya hai

ho pareshan mujh se KHalwat mein

bad-gumani nahin to phir kya hai

aatish-e-tar ko dekh ai waiz

aag pani nahin to phir kya hai

tere saqi safed sine mein

arghawani nahin to phir kya hai

tu sune tur par kalim ki baat

KHush-bayani nahin to phir kya hai

zindagi jis ko log kahte hain

'badr' fani nahin to phir kya hai