jab jhuT rawiyon ke qalam bolne lage

jab jhuuT rāviyoñ ke qalam bolne lage

har ḳhud-sarī ko jāh-o-hasham bolne lage

ik izn-e-lab-kushā.ī ne bebāk kar diyā

dekho kis e'timād se ham bolne lage

koī kisī se pūchh rahā thā tirā surāġh

uTh uTh ke mere naqsh-e-qadam bolne lage

samjhe the āstīn chhupā legī sab gunāh

lekin ġhazab huā ki sanam bolne lage

haq-goī ke mahāz pe manzar badal gayā

ḳhāmosh sab arab haiñ ajam bolne lage

tambīh kī thī dil kī dahan bhī siye magar

maiñ kyā karūñ ki dīda-e-nam bolne lage

māhaul bad-gumān thā tañg aa ke 'tāj' bhī

ḳhāmosh hone vaale the kam bolne lage

jab jhuT rawiyon ke qalam bolne lage

har KHud-sari ko jah-o-hasham bolne lage

ek izn-e-lab-kushai ne bebak kar diya

dekho kis e'timad se hum bolne lage

koi kisi se puchh raha tha tera suragh

uTh uTh ke mere naqsh-e-qadam bolne lage

samjhe the aastin chhupa legi sab gunah

lekin ghazab hua ki sanam bolne lage

haq-goi ke mahaz pe manzar badal gaya

KHamosh sab arab hain ajam bolne lage

tambih ki thi dil ki dahan bhi siye magar

main kya karun ki dida-e-nam bolne lage

mahaul bad-guman tha tang aa ke 'taj' bhi

KHamosh hone wale the kam bolne lage