jab kabhi band kare muTThiyan bahar nikle

jab kabhī band kare muTThiyāñ bāhar nikle

sab ke hāthoñ meñ vahī dhuup ke manzar nikle

sab kī āñkhoñ meñ phañse the vahī pathrā.e se ḳhvāb

sab ke sab log tamannāoñ ke aazar nikle

hai ḳharābī isī ta.amīr meñ muzmar terī

mor ḳhush-fahm na itrā ki tire par nikle

ḳhaak hī kar de mujhe garm-nigāhī us kī

ek armān to terā dil-e-muztar nikle

ruuh ko kar ga.e raushan had-e-idrāk talak

zaḳhm mere mirī ummīd se baḌh kar nikle

yuuñ bhī sach hai ki har ik gaam pe ik manzil thī

phir bhī gum-karda tirī raah meñ aksar nikle

kin fusūñ-zād jahānoñ kā safar thā 'vasfī'

ham samajh baiThe jinheñ dasht samundar nikle

jab kabhi band kare muTThiyan bahar nikle

sab ke hathon mein wahi dhup ke manzar nikle

sab ki aankhon mein phanse the wahi pathrae se KHwab

sab ke sab log tamannaon ke aazar nikle

hai KHarabi isi tamir mein muzmar teri

mor KHush-fahm na itra ki tere par nikle

KHak hi kar de mujhe garm-nigahi us ki

ek arman to tera dil-e-muztar nikle

ruh ko kar gae raushan had-e-idrak talak

zaKHm mere meri ummid se baDh kar nikle

yun bhi sach hai ki har ek gam pe ek manzil thi

phir bhi gum-karda teri rah mein aksar nikle

kin fusun-zad jahanon ka safar tha 'wasfi'

hum samajh baiThe jinhen dasht samundar nikle