jab kabhi yaadon ka darwaza khula aaKHir-e-shab

jab kabhī yādoñ kā darvāza khulā āḳhir-e-shab

koī dar aayā ba-andāz-e-havā āḳhir-e-shab

ham pashemān idhar aur udhar vo nādim

shaam kā bhūlā huā aa hī gayā āḳhir-e-shab

dil ke āñgan meñ ba-sad naaz thā vo mahv-e-ḳhirām

phuul hī phuul thā naqsh-e-kaf-e-pā āḳhir-e-shab

kar sakā pesh na uryānī kā jab koī javāz

aa gayā oḌh ke mariyam kī ridā āḳhir-e-shab

sāñvlī shaam kī zulfoñ ke parastār tamām

ho ga.e aap hī masrūf-e-duā āḳhir-e-shab

niiñd aa hī ga.ī vāmāñda the a.asāb tamām

ThanDī ThanDī jo chalī mauj-e-sabā āḳhir-e-shab

vo kasak murġh-e-sahar kī thī navā meñ 'raunaq'

dil pe ik nashtar-e-ehsās lagā āḳhir-e-shab

jab kabhi yaadon ka darwaza khula aaKHir-e-shab

koi dar aaya ba-andaz-e-hawa aaKHir-e-shab

hum pasheman idhar aur udhar wo nadim

sham ka bhula hua aa hi gaya aaKHir-e-shab

dil ke aangan mein ba-sad naz tha wo mahw-e-KHiram

phul hi phul tha naqsh-e-kaf-e-pa aaKHir-e-shab

kar saka pesh na uryani ka jab koi jawaz

aa gaya oDh ke mariyam ki rida aaKHir-e-shab

sanwli sham ki zulfon ke parastar tamam

ho gae aap hi masruf-e-dua aaKHir-e-shab

nind aa hi gai wamanda the aasab tamam

ThanDi ThanDi jo chali mauj-e-saba aaKHir-e-shab

wo kasak murgh-e-sahar ki thi nawa mein 'raunaq'

dil pe ek nashtar-e-ehsas laga aaKHir-e-shab