jab kaha aur bhi duniya mein hasin achchhe hain

jab kahā aur bhī duniyā meñ hasīñ achchhe haiñ

kyā hī jhuñjhlā ke vo bole ki hamīñ achchhe haiñ

kis bharose ye kareñ tujh se vafā kī ummīd

kaun se Dhang tire jān-e-hazīñ achchhe haiñ

ḳhaak meñ aah milā kar hameñ kyā pūchhte ho

ḳhair jis taur haiñ ham ḳhāk-nashīñ achchhe haiñ

dil meñ kyā ḳhaak jagah duuñ tire armānoñ ko

ki makāñ hai ye ḳharāb aur makīñ achchhe haiñ

mujh ko kahte haiñ raqīboñ kī burā.ī sun kar

vo nahīñ tum se bure balki kahīñ achchhe haiñ

but vo kāfir haiñ ki ai 'dāġh' ḳhudā un se bachā.e

kaun kahtā hai ye ġhārat-gar-e-dīñ achchhe haiñ

jab kaha aur bhi duniya mein hasin achchhe hain

kya hi jhunjhla ke wo bole ki hamin achchhe hain

kis bharose ye karen tujh se wafa ki ummid

kaun se Dhang tere jaan-e-hazin achchhe hain

KHak mein aah mila kar hamein kya puchhte ho

KHair jis taur hain hum KHak-nashin achchhe hain

dil mein kya KHak jagah dun tere armanon ko

ki makan hai ye KHarab aur makin achchhe hain

mujh ko kahte hain raqibon ki burai sun kar

wo nahin tum se bure balki kahin achchhe hain

but wo kafir hain ki ai 'dagh' KHuda un se bachae

kaun kahta hai ye ghaarat-gar-e-din achchhe hain