jab KHairiyat se raat andheri guzar gai

jab ḳhairiyat se raat añdherī guzar ga.ī

chehre pe mere sub.h kī laalī bikhar ga.ī

bāñdhā huā hai ḳhud ko samundar ne is qadar

har mauj sar paTak ke idhar se udhar ga.ī

pal bhar kī ḳhush-nasībī gavāra nahīñ mujhe

vo kyā ḳhushī jo haath milā kar guzar ga.ī

ye kyā huā ki maiñ to baḌe pyaar se milā

tirchhī nazar zamāne kī mujh par Thahar ga.ī

sab muskurā rahe haiñ taraqqī ke naam par

zinda har aadmī hai magar ruuh mar ga.ī

shabnam ne mere sāmne chūmā thā pyaar se

sūkhe hue gulāb kī sūrat nikhar ga.ī

kis par yaqīñ karūñ kise samjhūñ maiñ rāz-dāñ

'hashmat' ye kashmakash mire jīvan meñ bhar ga.ī

jab KHairiyat se raat andheri guzar gai

chehre pe mere subh ki lali bikhar gai

bandha hua hai KHud ko samundar ne is qadar

har mauj sar paTak ke idhar se udhar gai

pal bhar ki KHush-nasibi gawara nahin mujhe

wo kya KHushi jo hath mila kar guzar gai

ye kya hua ki main to baDe pyar se mila

tirchhi nazar zamane ki mujh par Thahar gai

sab muskura rahe hain taraqqi ke nam par

zinda har aadmi hai magar ruh mar gai

shabnam ne mere samne chuma tha pyar se

sukhe hue gulab ki surat nikhar gai

kis par yaqin karun kise samjhun main raaz-dan

'hashmat' ye kashmakash mere jiwan mein bhar gai