jab kisi dil mein chah hoti hai

jab kisī dil meñ chaah hotī hai

ruuh ātish-panāh hotī hai

jis kī hālat tabāh hotī hai

us kī sūrat gavāh hotī hai

dil meñ jab hubb-e-jāh hotī hai

dil kī duniyā tabāh hotī hai

ruuh jab jalva-gāh hotī hai

rū-kash-e-mehr-o-māh hotī hai

ishq-bāzī gunāh hotī hai

naujavānī tabāh hotī hai

jis jagah ḳhānqāh hotī hai

ma.asiyat uzr-ḳhvāh hotī hai

qahr kī jab nigāh hotī hai

merī hālat tabāh hotī hai

husn kī jo nigāh hotī hai

ishq kī shāhrāh hotī hai

kaun hotā hai monis-e-shab-e-ġham

naala hotā hai aah hotī hai

aaj āmāda-e-karam haiñ vo

be-gunāhī gunāh hotī hai

sharh-e-ulfat ke mas.ale haiñ judā

be-gunāhī gunāh hotī hai

husn-e-ḳhud-bīñ kī shoḳhiyāñ tauba

be-gunāhī gunāh hotī hai

hijr kī raat ai ma.āz-allāh

saarī duniyā tabāh hotī hai

dil meñ aatā hai kaif kā sailāb

lutf kī jab nigāh hotī hai

ahd-e-ulfat kī hai yahī takmīl

ġhair se rasm-o-rāh hotī hai

jāgtā hai agar kisī kā baḳht

ishq meñ dastgāh hotī hai

un ke kūche meñ marne vāloñ kī

ḳhuld ārām-gāh hotī hai

dekh le muñh ke pherne vaale

dil kī duniyā tabāh hotī hai

kal qayāmat meñ hogā muñh kaalā

aaj dāḌhī siyāh hotī hai

zindagī jis ko log kahte haiñ

hālat-e-ishtibāh hotī hai

jis ko gū-gird-e-surḳh kahte haiñ

vo tirī gard-e-rāh hotī hai

naaz kartī hai husn kī fitrat

āshiqī jab tabāh hotī hai

lījiye aa.e haiñ vo turbat par

mahr kī kab nigāh hotī hai

jis meñ ho imtiyāz-e-ranj-o-ḳhushī

aisī ulfat gunāh hotī hai

jo giraftār-e-ishq hotā hai

us kī sūrat gavāh hotī hai

sabr ko jo na kar de betābī

vo bhī koī nigāh hotī hai

vo bhī hotī hai dekhiye badnām

jo nazar be-gunāh hotī hai

go bahut duur haiñ tufail magar

yaad shām-o-pagāh hotī hai

hijr meñ raushnī bhī ai 'as.ad'

rashk-e-baḳht-e-siyāh hotī hai

jab kisi dil mein chah hoti hai

ruh aatish-panah hoti hai

jis ki haalat tabah hoti hai

us ki surat gawah hoti hai

dil mein jab hubb-e-jah hoti hai

dil ki duniya tabah hoti hai

ruh jab jalwa-gah hoti hai

ru-kash-e-mehr-o-mah hoti hai

ishq-bazi gunah hoti hai

naujawani tabah hoti hai

jis jagah KHanqah hoti hai

masiyat uzr-KHwah hoti hai

qahr ki jab nigah hoti hai

meri haalat tabah hoti hai

husn ki jo nigah hoti hai

ishq ki shahrah hoti hai

kaun hota hai monis-e-shab-e-gham

nala hota hai aah hoti hai

aaj aamada-e-karam hain wo

be-gunahi gunah hoti hai

sharh-e-ulfat ke masale hain juda

be-gunahi gunah hoti hai

husn-e-KHud-bin ki shoKHiyan tauba

be-gunahi gunah hoti hai

hijr ki raat ai maaz-allah

sari duniya tabah hoti hai

dil mein aata hai kaif ka sailab

lutf ki jab nigah hoti hai

ahd-e-ulfat ki hai yahi takmil

ghair se rasm-o-rah hoti hai

jagta hai agar kisi ka baKHt

ishq mein dastgah hoti hai

un ke kuche mein marne walon ki

KHuld aaram-gah hoti hai

dekh le munh ke pherne wale

dil ki duniya tabah hoti hai

kal qayamat mein hoga munh kala

aaj daDhi siyah hoti hai

zindagi jis ko log kahte hain

haalat-e-ishtibah hoti hai

jis ko gu-gird-e-surKH kahte hain

wo teri gard-e-rah hoti hai

naz karti hai husn ki fitrat

aashiqi jab tabah hoti hai

lijiye aae hain wo turbat par

mahr ki kab nigah hoti hai

jis mein ho imtiyaz-e-ranj-o-KHushi

aisi ulfat gunah hoti hai

jo giraftar-e-ishq hota hai

us ki surat gawah hoti hai

sabr ko jo na kar de betabi

wo bhi koi nigah hoti hai

wo bhi hoti hai dekhiye badnam

jo nazar be-gunah hoti hai

go bahut dur hain tufail magar

yaad sham-o-pagah hoti hai

hijr mein raushni bhi ai 'asad'

rashk-e-baKHt-e-siyah hoti hai