jab main roya hun wo roe hain ye ulfat mere sath

jab maiñ royā huuñ vo ro.e haiñ ye ulfat mere saath

muddatoñ barsā kiyā hai abr-e-rahmat mere saath

jaan jaa.e yaar hai dil ko rahegā pās-e-ishq

qabr meñ jā.eñge tere rāz-e-ulfat mere saath

detī hai tarġhīb naale kī ki har āzurda-dost

dushmanī kartī hai ab merī mohabbat mere saath

maiñ to huuñ dil-dāda-e-ulfat kaho maiñ kyā karūñ

dil-rubā ho kar karo tum jab ye ulfat mere saath

shakl terī sāmne āñkhoñ ke hai āThoñ-pahar

yaad terī hai sharīk-e-ranj-o-rāhat mere saath

ban gayā betāb dil ik mahsharistān-e-ḳhayāl

ḳhvāb meñ jab vo hue sargarm-e-ulfat mere saath

yaad ab bhūle se bhī sub.h-e-vatan aatī nahīñ

ho ga.ī mānūs aisī shām-e-ġhurbat mere saath

dil meñ dhaḌkan lab pe naale chashm-e-tar meñ ashk-e-ḳhūñ

kyā kahūñ kyā kar ga.ī terī mohabbat mere saath

yaad aatā hai ye raftār-e-qamar ko dekh kar

sair kartā thā yuuñ hī vo māh-tal.at mere saath

tū hai aur terī nazar meñ ik qayāmat kā ġhurūr

maiñ huuñ aur ik mahshar-e-armān-o-hasrat mere saath

vo to ruḳhsat kar ke mujh ko ghar meñ jā baiThe magar

yaad un kī duur tak aa.ī thī 'shaukat' mere saath

jab main roya hun wo roe hain ye ulfat mere sath

muddaton barsa kiya hai abr-e-rahmat mere sath

jaan jae yar hai dil ko rahega pas-e-ishq

qabr mein jaenge tere raaz-e-ulfat mere sath

deti hai targhib nale ki ki har aazurda-dost

dushmani karti hai ab meri mohabbat mere sath

main to hun dil-dada-e-ulfat kaho main kya karun

dil-ruba ho kar karo tum jab ye ulfat mere sath

shakl teri samne aankhon ke hai aaThon-pahar

yaad teri hai sharik-e-ranj-o-rahat mere sath

ban gaya betab dil ek mahsharistan-e-KHayal

KHwab mein jab wo hue sargarm-e-ulfat mere sath

yaad ab bhule se bhi subh-e-watan aati nahin

ho gai manus aisi sham-e-ghurbat mere sath

dil mein dhaDkan lab pe nale chashm-e-tar mein ashk-e-KHun

kya kahun kya kar gai teri mohabbat mere sath

yaad aata hai ye raftar-e-qamar ko dekh kar

sair karta tha yun hi wo mah-talat mere sath

tu hai aur teri nazar mein ek qayamat ka ghurur

main hun aur ek mahshar-e-arman-o-hasrat mere sath

wo to ruKHsat kar ke mujh ko ghar mein ja baiThe magar

yaad un ki dur tak aai thi 'shaukat' mere sath