jab mera ghar bahisht si gul-wadiyon mein tha

jab merā ghar bahisht sī gul-vādiyoñ meñ thā

us vaqt maiñ ghirā huā shahzādiyoñ meñ thā

vo din havā hue vo zamāne guzar ga.e

bande kā jab qayām parī-zādiyoñ meñ thā

yak baar jo ujaḌ ga.e baste hue nagar

lagtā hai koī bhuut bhī in vādiyoñ meñ thā

baiThā thā jis pe maiñ ne vahī shāḳh kaaT dī

ḳhud merā haath hī mirī barbādiyoñ meñ thā

sad shukr hai ki mujh pe nigāh-e-karam paḌī

kab se udaas baiThā maiñ fariyādiyoñ meñ thā

apne banā.e jaal meñ ḳhud phañs ke rah gayā

masrūf merā yaar jo ustādiyoñ meñ thā

'hasrat' zarā sī bhuul hameñ qaid kar ga.ī

vo lutf ab kahāñ hai jo āzādiyoñ meñ thā

jab mera ghar bahisht si gul-wadiyon mein tha

us waqt main ghira hua shahzadiyon mein tha

wo din hawa hue wo zamane guzar gae

bande ka jab qayam pari-zadiyon mein tha

yak bar jo ujaD gae baste hue nagar

lagta hai koi bhut bhi in wadiyon mein tha

baiTha tha jis pe main ne wahi shaKH kaT di

KHud mera hath hi meri barbaadiyon mein tha

sad shukr hai ki mujh pe nigah-e-karam paDi

kab se udas baiTha main fariyaadiyon mein tha

apne banae jal mein KHud phans ke rah gaya

masruf mera yar jo ustadiyon mein tha

'hasrat' zara si bhul hamein qaid kar gai

wo lutf ab kahan hai jo aazadiyon mein tha