jab na tab laDne hi ko tayyar ho

jab na tab laḌne hī ko tayyār ho

ḳhush raho sāhib agar bezār ho

kahte haiñ sab yaar se kah hāl-e-dil

chup rahūñ kyoñ gar lab-e-iz.hār ho

so.oge yārān-e-rafta kab talak

aaj roz-e-hashr hai bedār ho

itne sin meñ ye sharārat hai ġhazab

ho to laḌke par baḌe ayyār ho

kis tarah taḌpe na vo terī nigāh

tiir sī jis ke jigar ke paar ho

ḳhaak dekhe lāla-o-gul kī taraf

yaar kā jo tālib-e-dīdār ho

kārvān-e-umr kā hai jald kuuch

vaqt ġhaflat kā nahīñ bedār ho

gar nahīñ manzūr hai marnā mirā

is qadar kyoñ dar-pa-e-āzār ho

haal apnā qābil-e-guftan nahīñ

kahiye us se jab koī ġham-ḳhvār ho

ek aalam ġharq ho lohū meñ gar

auj-e-mauj-e-dīda-e-ḳhūñ-bār ho

kyā urūj-e-ishq hai 'nāmī' ki jab

daar par sar ho.e tab sardār ho

jab na tab laDne hi ko tayyar ho

KHush raho sahib agar bezar ho

kahte hain sab yar se kah haal-e-dil

chup rahun kyon gar lab-e-izhaar ho

sooge yaran-e-rafta kab talak

aaj roz-e-hashr hai bedar ho

itne sin mein ye shararat hai ghazab

ho to laDke par baDe ayyar ho

kis tarah taDpe na wo teri nigah

tir si jis ke jigar ke par ho

KHak dekhe lala-o-gul ki taraf

yar ka jo talib-e-didar ho

karwan-e-umr ka hai jald kuch

waqt ghaflat ka nahin bedar ho

gar nahin manzur hai marna mera

is qadar kyon dar-pa-e-azar ho

haal apna qabil-e-guftan nahin

kahiye us se jab koi gham-KHwar ho

ek aalam gharq ho lohu mein gar

auj-e-mauj-e-dida-e-KHun-bar ho

kya uruj-e-ishq hai 'nami' ki jab

dar par sar hoe tab sardar ho