jab raston se ishq-e-kaamil hota hai

jab rastoñ se ishq-e-kāmil hotā hai

tab banda nazdīk-e-manzil hotā hai

hamdardī hai dil meñ to phir raah dikhā

bas tanqīdoñ se kyā hāsil hotā hai

haq kī bāteñ us kī samajh meñ aatī haiñ

jis bande ke siine meñ dil hotā hai

rishtoñ se samjhauta karnā paḌtā hai

varna kaun kisī ke qābil hotā hai

hairat hai vo jis ko ham se rabt nahīñ

dil bhī us kī jānib maa.il hotā hai

aaj kahāñ insāf kā mandir miltā hai

aaj kahāñ qaazī hī aadil hotā hai

ḳhud se to namrūd nahīñ bantā koī

asal meñ puurā shahar hī bābul hotā hai

ham ko to hañsne kī aadat hai varna

muskānoñ meñ dard bhī shāmil hotā hai

'haidar' dil meñ basne vaalā hī aksar

dil ke armānoñ kā qātil hotā hai

jab raston se ishq-e-kaamil hota hai

tab banda nazdik-e-manzil hota hai

hamdardi hai dil mein to phir rah dikha

bas tanqidon se kya hasil hota hai

haq ki baaten us ki samajh mein aati hain

jis bande ke sine mein dil hota hai

rishton se samjhauta karna paDta hai

warna kaun kisi ke qabil hota hai

hairat hai wo jis ko hum se rabt nahin

dil bhi us ki jaanib mail hota hai

aaj kahan insaf ka mandir milta hai

aaj kahan qazi hi aadil hota hai

KHud se to namrud nahin banta koi

asal mein pura shahar hi babul hota hai

hum ko to hansne ki aadat hai warna

muskanon mein dard bhi shamil hota hai

'haidar' dil mein basne wala hi aksar

dil ke armanon ka qatil hota hai