jab riha ho jaunga main ranj-o-gham ke dam se

jab rihā ho jā.ūñgā maiñ ranj-o-ġham ke daam se

tab kahūñgā ab guzartī hai baḌe ārām se

phirte-phirte thak ga.e ham saath kab tak us kā deñ

ab to jī ghabrā chalā hai gardish-e-ayyām se

fikr-e-duniyā ik taraf hai fikr-e-uqbā ik taraf

kis tarah guzregī yā-rab apnī ab ārām se

hai alāmat ye bhī ik merī shikast-e-tauba kī

mai pilātā hai jo saaqī mujh ko TuuTe jaam se

umr apnī sarf kar dī zulf-o-ruḳh ke dhyān meñ

kaam hī kyā is jahāñ ke ham ko sub.h-o-shām se

ḳhvāb ho gar silsila jaarī rakheñ tahrīr kā

kuchh tashaffī hotī hai is nāma-o-paiġhām se

rāt-din ranj-o-masā.ib kā hai ab to sāmnā

ik zamāna thā guzartī thī bahut ārām se

ek din vo thā ki chain aatā na thā mere baġhair

aaj vo barham hue jaate haiñ mere naam se

saḳhtiyoñ se rāt-din ham ko nahīñ miltī najāt

log kahte haiñ guzartī hai baḌe ārām se

tum usī ko sidq-e-dil se rāt-din japte raho

mushkileñ hotī haiñ āsāñ bas usī ke naam se

ġham na khānā ranj ke hai baa'd rāhat bhī zarūr

sabr karnā 'shād' guzregī bahut ārām se

jab riha ho jaunga main ranj-o-gham ke dam se

tab kahunga ab guzarti hai baDe aaram se

phirte-phirte thak gae hum sath kab tak us ka den

ab to ji ghabra chala hai gardish-e-ayyam se

fikr-e-duniya ek taraf hai fikr-e-uqba ek taraf

kis tarah guzregi ya-rab apni ab aaram se

hai alamat ye bhi ek meri shikast-e-tauba ki

mai pilata hai jo saqi mujh ko TuTe jam se

umr apni sarf kar di zulf-o-ruKH ke dhyan mein

kaam hi kya is jahan ke hum ko subh-o-sham se

KHwab ho gar silsila jari rakhen tahrir ka

kuchh tashaffi hoti hai is nama-o-paigham se

raat-din ranj-o-masaib ka hai ab to samna

ek zamana tha guzarti thi bahut aaram se

ek din wo tha ki chain aata na tha mere baghair

aaj wo barham hue jate hain mere nam se

saKHtiyon se raat-din hum ko nahin milti najat

log kahte hain guzarti hai baDe aaram se

tum usi ko sidq-e-dil se raat-din japte raho

mushkilen hoti hain aasan bas usi ke nam se

gham na khana ranj ke hai ba'd rahat bhi zarur

sabr karna 'shad' guzregi bahut aaram se