jab safar ko maine thama tha ye andha rasta

jab safar ko maiñ ne thāmā thā ye andhā rāsta

aaj rotā hai magar qadmoñ se lipTā rāsta

tairtī phirtī haiñ chāroñ samt rañgīñ titliyāñ

TeḌhā TeḌhā ūñchā nīchā giilā kachchā rāsta

kaun suntā thā kisī kī koī kyā kahtā vahāñ

mere kāñdhe pe safar thā maiñ ne pakḌā rāsta

vo jo guzrā thā yahāñ se kyā pata lauTe kabhī

kyā ḳhalā meñ tāktā rahtā hai tanhā rāsta

mujh ko jaltī aag miltī tum ko ThanDā āb-e-jū

apnī apnī justujū hai apnā apnā rāsta

resha resha zaḳhm thā lauTā safar se jab 'shamīm'

aur mujh se bhī ziyāda hāñptā thā rāsta

jab safar ko main ne thama tha ye andha rasta

aaj rota hai magar qadmon se lipTa rasta

tairti phirti hain chaaron samt rangin titliyan

TeDha TeDha uncha nicha gila kachcha rasta

kaun sunta tha kisi ki koi kya kahta wahan

mere kandhe pe safar tha main ne pakDa rasta

wo jo guzra tha yahan se kya pata lauTe kabhi

kya KHala mein takta rahta hai tanha rasta

mujh ko jalti aag milti tum ko ThanDa aab-e-ju

apni apni justuju hai apna apna rasta

resha resha zaKHm tha lauTa safar se jab 'shamim'

aur mujh se bhi ziyaada hanpta tha rasta