jab se basa hai dil mein teri dilkashi ka rang

jab se basā hai dil meñ tirī dilkashī kā rang

yak-rang ho gayā hai mirī zindagī kā rang

apnoñ ne bārhā mujhe ġhurbat meñ chhoḌ kar

dekhā hai kis ḳhushī se mirī bebasī kā rang

ḳhud aa.ine meñ dil ke mire jhāñk lījiye

ġhairoñ se pūchhiye na mirī āshiqī kā rang

zulf-e-siyāh raqsāñ hai ruḳhsār-e-yār par

nūr-e-sahar se uljhā hai tīra-shabī kā rang

merī kitāb-e-zīst ko tū dekh ġhaur se

phailā hai har varaq pe tirī dilkashī kā rang

dekhā jo maiñ ne ḳhvāb meñ us but ko be-hijāb

ab tak 'zafar' pe chhāyā hai ik be-ḳhudī kā rang

jab se basa hai dil mein teri dilkashi ka rang

yak-rang ho gaya hai meri zindagi ka rang

apnon ne barha mujhe ghurbat mein chhoD kar

dekha hai kis KHushi se meri bebasi ka rang

KHud aaine mein dil ke mere jhank lijiye

ghairon se puchhiye na meri aashiqi ka rang

zulf-e-siyah raqsan hai ruKHsar-e-yar par

nur-e-sahar se uljha hai tira-shabi ka rang

meri kitab-e-zist ko tu dekh ghaur se

phaila hai har waraq pe teri dilkashi ka rang

dekha jo main ne KHwab mein us but ko be-hijab

ab tak 'zafar' pe chhaya hai ek be-KHudi ka rang