jab se hun halqa-ba-gosh-e-dar-e-mai-KHana-e-ishq

jab se huuñ halqa-ba-gosh-e-dar-e-mai-ḳhāna-e-ishq

shīsha pahlū meñ hai aur haath meñ paimāna-e-ishq

sarmadī ganj se māmūr hai vīrāna-e-ishq

nūr-e-irfāñ se hai labrez siyah-ḳhāna-e-ishq

ab na vo mai hai na vo gardish-e-paimāna-e-ishq

kaisī ḳhāmosh huī majlis-e-vīrāna-e-ishq

dīda-e-husn banā le ise surma apnā

rashk-e-iksīr hai ḳhākistar-e-parvāna-e-ishq

kyā ḳhabar is kī haqīqat se tujhe ai zāhid

sau tajallī kā mahal hai dar-e-kāshāna-e-ishq

bazm-e-ālam meñ bahaltā nahīñ ab dil apnā

le chal ai josh-e-junūñ jānib-e-vīrāna-e-ishq

terī hī zaat se qaa.em hai vajūd-e-insāñ

sho.ala-e-husn se hai hastī-e-parvāna-e-ishq

mil ga.ī is ko tirī yaad meñ aisī lazzat

hūr-o-firdaus se bezār hai dīvāna-e-ishq

jal-mare soz-e-mohabbat se sahar tak donoñ

sham-o-parvāna se pūchhe koī afsāna-e-ishq

donoñ aalam se sarokār nahīñ ab mujh ko

bas-ki hai pesh-e-nazar jalva-e-mastāna-e-ishq

har ghaḌī ruuh ko hotī hai na.ī ik farhat

ġhairat-e-gulshan-e-firdaus hai vīrāna-e-ishq

tum se hai rabt-e-ḳhudā-dād azal se mujh ko

sho.ala-e-husn jo tum ho to maiñ parvāna-e-ishq

mujh ko ishrat-kada-e-dahr se kyā kaam 'valī'

in dinoñ maiñ huuñ aur ik gosha-e-ġham-ḳhāna-e-ishq

jab se hun halqa-ba-gosh-e-dar-e-mai-KHana-e-ishq

shisha pahlu mein hai aur hath mein paimana-e-ishq

sarmadi ganj se mamur hai virana-e-ishq

nur-e-irfan se hai labrez siyah-KHana-e-ishq

ab na wo mai hai na wo gardish-e-paimana-e-ishq

kaisi KHamosh hui majlis-e-virana-e-ishq

dida-e-husn bana le ise surma apna

rashk-e-iksir hai KHakistar-e-parwana-e-ishq

kya KHabar is ki haqiqat se tujhe ai zahid

sau tajalli ka mahal hai dar-e-kashana-e-ishq

bazm-e-alam mein bahalta nahin ab dil apna

le chal ai josh-e-junun jaanib-e-virana-e-ishq

teri hi zat se qaem hai wajud-e-insan

shoala-e-husn se hai hasti-e-parwana-e-ishq

mil gai is ko teri yaad mein aisi lazzat

hur-o-firdaus se bezar hai diwana-e-ishq

jal-mare soz-e-mohabbat se sahar tak donon

sham-o-parwana se puchhe koi afsana-e-ishq

donon aalam se sarokar nahin ab mujh ko

bas-ki hai pesh-e-nazar jalwa-e-mastana-e-ishq

har ghaDi ruh ko hoti hai nai ek farhat

ghairat-e-gulshan-e-firdaus hai virana-e-ishq

tum se hai rabt-e-KHuda-dad azal se mujh ko

shoala-e-husn jo tum ho to main parwana-e-ishq

mujh ko ishrat-kada-e-dahr se kya kaam 'wali'

in dinon main hun aur ek gosha-e-gham-KHana-e-ishq