jab se ek shoKH-nazar phail gai chehre par

jab se ik shoḳh-nazar phail ga.ī chehre par

ātish-e-barq-o-sharar phail ga.ī chehre par

baat chupke se mohabbat ne mere kaan meñ kī

aur ḳhushiyoñ kī ḳhabar phail ga.ī chehre par

raah meñ us kī jalā.e the umīdoñ ne charāġh

raushnī kī thī kidhar phail ga.ī chehre par

kis ne shīshe kī tarah toḌ diyā thā us ko

choT dil meñ thī magar phail ga.ī chehre par

sāl-hā-sāl kī rātoñ ke pare aa.ī thī

umr bhar ko vo sahar phail ga.ī chehre par

sard-jazboñ pe taras khā ke ye ehsās kī dhuup

dil pe karne ko asar phail ga.ī chehre par

ġham ke kuchh sañg-e-garāñ jab se mire dil pe gire

ik nadī thī jo udhar phail ga.ī chehre par

ḳhvāb manzil ke sajā.e the merī āñkhoñ ne

aur 'hinā' gard-e-safar phail ga.ī chehre par

jab se ek shoKH-nazar phail gai chehre par

aatish-e-barq-o-sharar phail gai chehre par

baat chupke se mohabbat ne mere kan mein ki

aur KHushiyon ki KHabar phail gai chehre par

rah mein us ki jalae the umidon ne charagh

raushni ki thi kidhar phail gai chehre par

kis ne shishe ki tarah toD diya tha us ko

choT dil mein thi magar phail gai chehre par

sal-ha-sal ki raaton ke pare aai thi

umr bhar ko wo sahar phail gai chehre par

sard-jazbon pe taras kha ke ye ehsas ki dhup

dil pe karne ko asar phail gai chehre par

gham ke kuchh sang-e-garan jab se mere dil pe gire

ek nadi thi jo udhar phail gai chehre par

KHwab manzil ke sajae the meri aankhon ne

aur 'hina' gard-e-safar phail gai chehre par