jab se koi mera ham-safar ho gaya

jab se koī mirā ham-safar ho gayā

zindagī kā safar mo'tabar ho gayā

mo'tabar ho ke nā-mo'tabar ho gayā

kis kī chāhat meñ maiñ dar-ba-dar ho gayā

tum ne aane kī zahmat gavārā jo kī

misl firdaus ke merā ghar ho gayā

mushkileñ jis qadar rāstoñ kī baḌhīñ

aur āsāñ hamārā safar ho gayā

jis pe bhī ho gayā us nazar kā karam

apnī hī zaat se be-ḳhabar ho gayā

mujh ko dekhā hai us ne kis andāz se

dil meñ paivast tīr-e-nazar ho gayā

qāfile kā har ik fard hai muntashir

ġham na jaane kahāñ rāhbar ho gayā

jab se ‘rizvāñ’ huā sāhab-e-sīm-o-zar

us kā jo 'aib thā vo hunar ho gayā

jab se koi mera ham-safar ho gaya

zindagi ka safar mo'tabar ho gaya

mo'tabar ho ke na-mo'tabar ho gaya

kis ki chahat mein main dar-ba-dar ho gaya

tum ne aane ki zahmat gawara jo ki

misl firdaus ke mera ghar ho gaya

mushkilen jis qadar raston ki baDhin

aur aasan hamara safar ho gaya

jis pe bhi ho gaya us nazar ka karam

apni hi zat se be-KHabar ho gaya

mujh ko dekha hai us ne kis andaz se

dil mein paiwast tir-e-nazar ho gaya

qafile ka har ek fard hai muntashir

gham na jaane kahan rahbar ho gaya

jab se ‘rizwan’ hua sahab-e-sim-o-zar

us ka jo 'aib tha wo hunar ho gaya