jab se mein ne dekha hai ek KHushnuma chehra

jab se meñ ne dekhā hai ek ḳhushnumā chehra

tab se hai nigāhoñ meñ us kā chāñd sā chehra

sūrat aur sīrat meñ imtiyāz mushkil hai

hai har ek chehre par ek dūsrā chehra

ek aur do hī meñ zehn thā parāganda

aa gayā kahāñ se ye ek tīsrā chehra

bā-vafā samajhtā thā jis ko bevafā niklā

roz vo badaltā hai ik na ik nayā chehra

thā naqāb meñ ab tak be-hijāb jab dekhā

faash ho gayā āḳhir us kā bad-numā chehra

duur se samajhte the jis ko chāñd kā TukḌā

jab qarīb se dekhā thā vo khurdurā chehra

merī chashm-e-bātin se kuchh nahīñ hai poshīda

hai zabān-e-dil 'barqī' ā.ina-numā chehra

jab se mein ne dekha hai ek KHushnuma chehra

tab se hai nigahon mein us ka chand sa chehra

surat aur sirat mein imtiyaz mushkil hai

hai har ek chehre par ek dusra chehra

ek aur do hi mein zehn tha paraganda

aa gaya kahan se ye ek tisra chehra

ba-wafa samajhta tha jis ko bewafa nikla

roz wo badalta hai ek na ek naya chehra

tha naqab mein ab tak be-hijab jab dekha

fash ho gaya aaKHir us ka bad-numa chehra

dur se samajhte the jis ko chand ka TukDa

jab qarib se dekha tha wo khurdura chehra

meri chashm-e-baatin se kuchh nahin hai poshida

hai zaban-e-dil 'barqi' aaina-numa chehra