jab se sane ne banaya hai jahan ka bahrup

jab se saan.e ne banāyā hai jahāñ kā bahrūp

apnī nazroñ meñ hai sab kaun-o-makāñ kā bahrūp

maiñ gayā bhes badal kar to lagā yuuñ kahne

chal be laayā hai mire aage kahāñ kā bahrūp

chāñd taare haiñ ye kaise ye shab o roz hai kyā

kuchh samajh meñ nahīñ aatā hai yahāñ kā bahrūp

chashm-e-bīnā hoñ to dāḌhī kī do-rañgī samjheñ

ek chehre pe hai ye piir o javāñ kā bahrūp

pahne jaate haiñ ka.ī rañg ke kapḌe din meñ

kyā kahūñ haa.e ġhazab hai ye butāñ kā bahrūp

baaġh meñ turra-e-sumbul kī pareshānī se

saaf niklā tire shorīda-sarāñ kā bahrūp

'mus.hafī' saañg se kyā ukhḌe hai pashm us kī bhalā

sau tarah se ho jise yaad zabāñ kā bahrūp

jab se sane ne banaya hai jahan ka bahrup

apni nazron mein hai sab kaun-o-makan ka bahrup

main gaya bhes badal kar to laga yun kahne

chal be laya hai mere aage kahan ka bahrup

chand tare hain ye kaise ye shab o roz hai kya

kuchh samajh mein nahin aata hai yahan ka bahrup

chashm-e-bina hon to daDhi ki do-rangi samjhen

ek chehre pe hai ye pir o jawan ka bahrup

pahne jate hain kai rang ke kapDe din mein

kya kahun hae ghazab hai ye butan ka bahrup

bagh mein turra-e-sumbul ki pareshani se

saf nikla tere shorida-saran ka bahrup

'mushafi' sang se kya ukhDe hai pashm us ki bhala

sau tarah se ho jise yaad zaban ka bahrup