jab se suna dahan tere ai mah-ru nahin

jab se sunā dahan tire ai māh-rū nahīñ

sab chup haiñ ab kisī kī koī guftugū nahīñ

nikle jo qalb se vo mirī aarzū nahīñ

tū mil hī jaa.e gar to maiñ samjhūñ ki tū nahīñ

āñkheñ laḌā rahe ho sar-e-bazm ġhair se

aur mujh se ye bayān ki ham jañg-jū nahīñ

paidā huā hai ek kī zid ek ḳhalq meñ

izzat hai ġhair kī tū mirī aabrū nahīñ

Tāñke na khā.eñ zaḳhmī-e-teġh-e-nigāh-e-nāz

kahne ko ho ki jāma-e-tan meñ rafū nahīñ

ma.ashūq kaun sā hai na ho dil meñ jis kī yaad

is muḳhtasar se baaġh meñ kis gul kī bū nahīñ

ye haal terī va.ada-ḳhilāfī se ho gayā

ab to qasam bhī khāne ko mujh meñ lahū nahīñ

piirī hai āshiqī kā maza jā chukā 'rashīd'

vo ham nahīñ vo dil nahīñ vo aarzū nahīñ

jab se suna dahan tere ai mah-ru nahin

sab chup hain ab kisi ki koi guftugu nahin

nikle jo qalb se wo meri aarzu nahin

tu mil hi jae gar to main samjhun ki tu nahin

aankhen laDa rahe ho sar-e-bazm ghair se

aur mujh se ye bayan ki hum jang-ju nahin

paida hua hai ek ki zid ek KHalq mein

izzat hai ghair ki tu meri aabru nahin

Tanke na khaen zaKHmi-e-tegh-e-nigah-e-naz

kahne ko ho ki jama-e-tan mein rafu nahin

mashuq kaun sa hai na ho dil mein jis ki yaad

is muKHtasar se bagh mein kis gul ki bu nahin

ye haal teri wada-KHilafi se ho gaya

ab to qasam bhi khane ko mujh mein lahu nahin

piri hai aashiqi ka maza ja chuka 'rashid'

wo hum nahin wo dil nahin wo aarzu nahin