jab se tere mizaj mein chahat nahin rahi

jab se tire mizāj meñ chāhat nahīñ rahī

ham ko bhī tere dar kī zarūrat nahīñ rahī

pathrāv jism-o-jān pe had se guzar gayā

phir yuuñ huā ki dard meñ shiddat nahīñ rahī

din kī thakān raat ko bistar pe le ga.ī

tum ko bhī yaad karne kī fursat nahīñ rahī

tanhā sī ho ga.ī haiñ ye kamroñ meñ sardiyāñ

yādoñ ke is alaav meñ hiddat nahīñ rahī

tum ne bhī apne aap ko masrūf kar liyā

ham ko bhī intizār kī aadat nahīñ rahī

achchhā huā jo tum se ta'alluq nahīñ rahā

din-rāt sochne kī aziyyat nahīñ rahī

jab se tere mizaj mein chahat nahin rahi

hum ko bhi tere dar ki zarurat nahin rahi

pathraw jism-o-jaan pe had se guzar gaya

phir yun hua ki dard mein shiddat nahin rahi

din ki thakan raat ko bistar pe le gai

tum ko bhi yaad karne ki fursat nahin rahi

tanha si ho gai hain ye kamron mein sardiyan

yaadon ke is alaw mein hiddat nahin rahi

tum ne bhi apne aap ko masruf kar liya

hum ko bhi intizar ki aadat nahin rahi

achchha hua jo tum se ta'alluq nahin raha

din-raat sochne ki aziyyat nahin rahi