jab se tumhaari aankhen aalam ko bhaiyan hain

jab se tumhārī āñkheñ aalam ko bhā.iyāñ haiñ

tab se jahāñ meñ tum ne dhūmeñ machā.iyāñ haiñ

jaur-o-jafā o mehnat mehr-o-vafā-o-ulfat

tum kyuuñ baḌhā.iyāñ haiñ aur kyuuñ ghaTā.iyāñ haiñ

mil mil ke ruuTh jaanā aur ruuTh ruuTh milnā

ye kyā ḳharābiyāñ haiñ kyā jag-hañsā.iyāñ haiñ

Tuk Tuk sarak sarak kar aa baiThnā baġhal meñ

kyā achpalā.iyāñ haiñ aur kyā DhiTā.iyāñ haiñ

zulfoñ kā bil banāte āñkheñ churā ke chalnā

kyā kam-nigāhiyāñ haiñ kyā kaj-adā.iyāñ haiñ

ā.īna rū-ba-rū rakh aur apnī saj banānā

kyā ḳhud-pasañdiyāñ haiñ kyā ḳhud-numā.iyāñ haiñ

āñchal uThā ke tum ne jo Dhāñk liiñ ye chhatiyāñ

kis ko dikhā.iyāñ haiñ kis se chupā.iyāñ haiñ

tum meñ jo shoḳhiyāñ haiñ aur chanchalā.iyāñ haiñ

kin ne sikhā.iyāñ haiñ kin ne batā.iyāñ haiñ

'hātim' ke bin ishāra sach kah ye chashm-o-abrū

kis se laḌā.iyāñ haiñ kis par chaḌhā.iyāñ haiñ

jab se tumhaari aankhen aalam ko bhaiyan hain

tab se jahan mein tum ne dhumen machaiyan hain

jaur-o-jafa o mehnat mehr-o-wafa-o-ulfat

tum kyun baDhaiyan hain aur kyun ghaTaiyan hain

mil mil ke ruTh jaana aur ruTh ruTh milna

ye kya KHarabiyan hain kya jag-hansaiyan hain

Tuk Tuk sarak sarak kar aa baiThna baghal mein

kya achpalaiyan hain aur kya DhiTaiyan hain

zulfon ka bil banate aankhen chura ke chalna

kya kam-nigahiyan hain kya kaj-adaiyan hain

aaina ru-ba-ru rakh aur apni saj banana

kya KHud-pasandiyan hain kya KHud-numaiyan hain

aanchal uTha ke tum ne jo Dhank lin ye chhatiyan

kis ko dikhaiyan hain kis se chupaiyan hain

tum mein jo shoKHiyan hain aur chanchalaiyan hain

kin ne sikhaiyan hain kin ne bataiyan hain

'hatim' ke bin ishaara sach kah ye chashm-o-abru

kis se laDaiyan hain kis par chaDhaiyan hain