jab sham hui dil ghabraya log uTh ke barae sair chale

jab shaam huī dil ghabrāyā log uTh ke barā.e sair chale

taftīsh-e-sanam ko sū-e-haram ham jaan ke dil meñ dair chale

go bahr-e-alam tūfānī hai har mauj adū-e-jānī hai

ab paañv rukeñge kyā apne is dariyā ko ham pair chale

ab kaam hamārā yaañ kyā hai ye aanā jaanā bejā hai

jis vaqt tumhārī sohbat meñ ham hoñ aur hukm-e-ġhair chale

ham samjhe the yaañ ā.eñge din thoḌā hai rah jā.eñge

par dil kī hasrat dil meñ rahī jab sū-e-makān-e-ġhair chale

go rañj-e-judā.ī hai dil par be-vaqt hai ye daur-e-sāġhar

baiThe haiñ 'habīb' ahbāb magar ab tum bhī kah do ḳhair chale

jab sham hui dil ghabraya log uTh ke barae sair chale

taftish-e-sanam ko su-e-haram hum jaan ke dil mein dair chale

go bahr-e-alam tufani hai har mauj adu-e-jaani hai

ab panw rukenge kya apne is dariya ko hum pair chale

ab kaam hamara yan kya hai ye aana jaana beja hai

jis waqt tumhaari sohbat mein hum hon aur hukm-e-ghair chale

hum samjhe the yan aaenge din thoDa hai rah jaenge

par dil ki hasrat dil mein rahi jab su-e-makan-e-ghair chale

go ranj-e-judai hai dil par be-waqt hai ye daur-e-saghar

baiThe hain 'habib' ahbab magar ab tum bhi kah do KHair chale