jab shikayat thi ki tufan mein sahaara na mila

jab shikāyat thī ki tūfāñ meñ sahārā na milā

ab kināre pe bhī aa.e to kinārā na milā

be-sahāroñ ko kahīñ koī sahārā na milā

koī tūfāñ na milā koī kinārā na milā

haath uTThe hī nahīñ sāġhar o miinā kī taraf

ham ko jab tak tirī āñkhoñ kā ishārā na milā

chal na saktā thā kabhī ahl-e-havas kā jaadū

tujh ko ai dost koī ishq kā maarā na milā

jis ne dekhā hameñ dushman kī nazar se dekhā

terī mahfil meñ koī dost hamārā na milā

maut behtar hai 'shamīm' us ke liye jiine se

jis ko jiine ke liye koī sahārā na milā

jab shikayat thi ki tufan mein sahaara na mila

ab kinare pe bhi aae to kinara na mila

be-sahaaron ko kahin koi sahaara na mila

koi tufan na mila koi kinara na mila

hath uTThe hi nahin saghar o mina ki taraf

hum ko jab tak teri aankhon ka ishaara na mila

chal na sakta tha kabhi ahl-e-hawas ka jadu

tujh ko ai dost koi ishq ka mara na mila

jis ne dekha hamein dushman ki nazar se dekha

teri mahfil mein koi dost hamara na mila

maut behtar hai 'shamim' us ke liye jine se

jis ko jine ke liye koi sahaara na mila