jab sine se marne ka Dar niklega

jab siine se marne kā Dar niklegā

aur hī kuchh ye ḳhaak kā paikar niklegā

bo jo rahā huuñ amn-o-amāñ kī fasleñ maiñ

dekhnā kal is ḳhaak se lashkar niklegā

sail banegā hone kā idrāk kabhī

is manzar se aur hī manzar niklegā

duniyā jiite jī jo duniyā ho na sakī

siine se ye armāñ mar kar niklegā

gul-chīnoñ ke zulm kī koī had hī nahīñ

kis din har ik shāḳh se ḳhanjar niklegā

jidd-o-jahd kī jis se bāteñ hotī haiñ

kyā hogā jab ik din muḳhbar niklegā

'bedī' merā qadam hī hogā duniyā meñ

jo hadd-e-imkāñ se bāhar niklegā

jab sine se marne ka Dar niklega

aur hi kuchh ye KHak ka paikar niklega

bo jo raha hun amn-o-aman ki faslen main

dekhna kal is KHak se lashkar niklega

sail banega hone ka idrak kabhi

is manzar se aur hi manzar niklega

duniya jite ji jo duniya ho na saki

sine se ye arman mar kar niklega

gul-chinon ke zulm ki koi had hi nahin

kis din har ek shaKH se KHanjar niklega

jidd-o-jahd ki jis se baaten hoti hain

kya hoga jab ek din muKHbar niklega

'bedi' mera qadam hi hoga duniya mein

jo hadd-e-imkan se bahar niklega