jab subh ki dahliz pe bazar lagega

jab sub.h kī dahlīz pe bāzār lagegā

har manzar-e-shab ḳhvāb kī dīvār lagegā

pal bhar meñ bikhar jā.eñge yādoñ ke zaḳhīre

jab zehn pe ik sañg-e-girāñ-bār lagegā

gūñdhe haiñ na.ī shab ne sitāroñ ke na.e haar

kab ghar mirā ā.īna-e-anvār lagegā

gar sail-e-ḳhurāfāt meñ bah jaa.eñ ye āñkheñ

har harf-e-yaqīñ kalma-e-inkār lagegā

hālāt na badle to tamannā kī zamīñ par

TuuTī huī ummīdoñ kā ambār lagegā

khilte rahe gar phuul lahū meñ yūñhī 'akbar'

har fasl meñ dil apnā saman-zār lagegā

jab subh ki dahliz pe bazar lagega

har manzar-e-shab KHwab ki diwar lagega

pal bhar mein bikhar jaenge yaadon ke zaKHire

jab zehn pe ek sang-e-giran-bar lagega

gundhe hain nai shab ne sitaron ke nae haar

kab ghar mera aaina-e-anwar lagega

gar sail-e-KHurafat mein bah jaen ye aankhen

har harf-e-yaqin kalma-e-inkar lagega

haalat na badle to tamanna ki zamin par

TuTi hui ummidon ka ambar lagega

khilte rahe gar phul lahu mein yunhi 'akbar'

har fasl mein dil apna saman-zar lagega