jab taghaful ka silsila hi nahin

jab taġhāful kā silsila hī nahīñ

ishq kā phir to kuchh maza hī nahīñ

āñkhoñ āñkhoñ meñ guftugū to huī

kuchh zabāñ se kahā gayā hī nahīñ

mausam-e-gul ne lī hai añgḌā.ī

vahshat-e-dil tujhe pata hī nahīñ

terī itnī hasīn duniyā meñ

be-tamannā jiyā gayā hī nahīñ

jaane kaisī hai ye masīhā.ī

mundamil zaḳhm-e-dil huā hī nahīñ

toḌ de dam kahīñ na tishna-labī

is jagah koī mai-kada hī nahīñ

āḳhirash ro paḌe ghane bādal

bār-e-ġham jab sahā gayā hī nahīñ

laakh chāhā ki bhuul jaa.eñ unheñ

ham se aisā kiyā gayā hī nahīñ

dostī hai mirī sabhī se 'tarab'

dushmanī kyā hai jāntā hī nahīñ

jab taghaful ka silsila hi nahin

ishq ka phir to kuchh maza hi nahin

aankhon aankhon mein guftugu to hui

kuchh zaban se kaha gaya hi nahin

mausam-e-gul ne li hai angDai

wahshat-e-dil tujhe pata hi nahin

teri itni hasin duniya mein

be-tamanna jiya gaya hi nahin

jaane kaisi hai ye masihai

mundamil zaKHm-e-dil hua hi nahin

toD de dam kahin na tishna-labi

is jagah koi mai-kada hi nahin

aaKHirash ro paDe ghane baadal

bar-e-gham jab saha gaya hi nahin

lakh chaha ki bhul jaen unhen

hum se aisa kiya gaya hi nahin

dosti hai meri sabhi se 'tarab'

dushmani kya hai jaanta hi nahin