jab tak fasil-e-jism ka dar khul na jaega

jab tak fasīl-e-jism kā dar khul na jā.egā

is dil kī yurishoñ kā tasalsul na jā.egā

ḳhemoñ se tā-furāt jo dariyā-e-ḳhūñ hai ye

us par se maslahat kā koī pul na jā.egā

us ko gumāñ nahīñ thā ki ahd-e-ḳhizāñ meñ bhī

ye zauq-e-naġhma-rezi-e-bulbul na jā.egā

ye abr-e-āgahī jo barastā rahā yūñhī

miTTī kā ye vajūd mirā ghul na jā.egā

girtā rahegā yūñhī balāoñ kā ābshār

jab tak ġhubār-e-qalb-o-nazar dhul na jā.egā

vo shaḳhs to ḳhudā.ī ke daave pe tul gayā

is had pe ham samajhte the bilkul na jā.egā

bas ai nigār-e-zīst yaqīñ aa gayā hameñ

ye terī be-ruḳhī ye ta.ammul na jā.egā

'anjum' nigār-e-zīst ko phir chāhiye vahī

ik sar jo ḳhvāhishoñ ke evaz tul na jā.egā

jab tak fasil-e-jism ka dar khul na jaega

is dil ki yurishon ka tasalsul na jaega

KHemon se ta-furaat jo dariya-e-KHun hai ye

us par se maslahat ka koi pul na jaega

us ko guman nahin tha ki ahd-e-KHizan mein bhi

ye zauq-e-naghma-rezi-e-bulbul na jaega

ye abr-e-agahi jo barasta raha yunhi

miTTi ka ye wajud mera ghul na jaega

girta rahega yunhi balaon ka aabshaar

jab tak ghubar-e-qalb-o-nazar dhul na jaega

wo shaKHs to KHudai ke dawe pe tul gaya

is had pe hum samajhte the bilkul na jaega

bas ai nigar-e-zist yaqin aa gaya hamein

ye teri be-ruKHi ye tammul na jaega

'anjum' nigar-e-zist ko phir chahiye wahi

ek sar jo KHwahishon ke ewaz tul na jaega