jab tak ki dil mein jazba-e-diwangi na ho

jab tak ki dil meñ jazba-e-dīvāngī na ho

lazzat-kash-e-hayāt-e-vafā be-ḳhudī na ho

kyā vo kareñge jalva-e-jānāñ kī aarzū

jin kī nazar meñ jur.at-e-nazzārgī na ho

ghabrā gayā huuñ ziist kī talḳhī se is qadar

is zindagī ke baa'd koī zindagī na ho

maanā ḳhushī meñ hotā hai be-ḳhud har aadmī

ḳhud ko bhī bhuul jā.ūñ maiñ aisī ḳhushī na ho

aa ai ġham-e-hayāt tujhe DhūñDhtā hai dil

vo ziist kyā ki jis meñ ġham-e-zindagī na ho

duniyā kī tīrgī ko miTā.eñge kis tarah

jin ke dil-o-nigāh meñ kuchh raushnī na ho

rah rah ke uTh rahā hai har ik samt kyoñ dhuāñ

nafrat kī aag shahr meñ har-sū lagī na ho

fikr-e-suḳhan ke vāste ġham chāhiye 'nashāt'

jab tak ki dil meñ dard na ho shā.irī na ho

jab tak ki dil mein jazba-e-diwangi na ho

lazzat-kash-e-hayat-e-wafa be-KHudi na ho

kya wo karenge jalwa-e-jaanan ki aarzu

jin ki nazar mein jurat-e-nazzargi na ho

ghabra gaya hun zist ki talKHi se is qadar

is zindagi ke ba'd koi zindagi na ho

mana KHushi mein hota hai be-KHud har aadmi

KHud ko bhi bhul jaun main aisi KHushi na ho

aa ai gham-e-hayat tujhe DhunDhta hai dil

wo zist kya ki jis mein gham-e-zindagi na ho

duniya ki tirgi ko miTaenge kis tarah

jin ke dil-o-nigah mein kuchh raushni na ho

rah rah ke uTh raha hai har ek samt kyon dhuan

nafrat ki aag shahr mein har-su lagi na ho

fikr-e-suKHan ke waste gham chahiye 'nashat'

jab tak ki dil mein dard na ho shairi na ho