jab talak sanson ko bu-e-dilruba milti rahi

jab talak sāñsoñ ko bū-e-dilrubā miltī rahī

chārāgar se qalb-e-muztar ko davā miltī rahī

jis kisī se bhī vafā kī bas jafā miltī rahī

'umr bhar jurm-e-mohabbat kī sazā miltī rahī

ham guzarte haiñ vahāñ se thaam kar qalb-o-jigar

jis galī jis moḌ par vo mah-laqā miltī rahī

kitne nādāñ the ki us kī justujū karte rahe

jaane kis kis āshnā se be-vafā miltī rahī

zindagī bhar har ḳhushī bas buuñd bhar miltī rahī

har ghaḌī ranj-o-alam ban kar qazā miltī rahī

ham taḌapte hī rahe jis kī jhalak ke vāste

vo 'adū se khol ke band-e-qabā miltī rahī

'iid ke din bhī gale miltā nahīñ dilbar 'sahāb'

bāñhoñ meñ bhar-bhar mujhe ḳhalq-e-ḳhudā miltī rahī

jab talak sanson ko bu-e-dilruba milti rahi

chaaragar se qalb-e-muztar ko dawa milti rahi

jis kisi se bhi wafa ki bas jafa milti rahi

'umr bhar jurm-e-mohabbat ki saza milti rahi

hum guzarte hain wahan se tham kar qalb-o-jigar

jis gali jis moD par wo mah-laqa milti rahi

kitne nadan the ki us ki justuju karte rahe

jaane kis kis aashna se be-wafa milti rahi

zindagi bhar har KHushi bas bund bhar milti rahi

har ghaDi ranj-o-alam ban kar qaza milti rahi

hum taDapte hi rahe jis ki jhalak ke waste

wo 'adu se khol ke band-e-qaba milti rahi

'id ke din bhi gale milta nahin dilbar 'sahab'

banhon mein bhar-bhar mujhe KHalq-e-KHuda milti rahi