jab tegh ko pakaD wo KHunKhaar ghar se nikla

jab teġh ko pakaḌ vo ḳhuñḳhār ghar se niklā

tab maiñ bhī jaan se ho bezār ghar se niklā

har mū-kamar ke sau sau bal paḌ ga.e kamar meñ

paTkā jo bāñdh kar vo bal-dār ghar se niklā

kushte ko tere dar se afsos le ga.e kal

aur tū na ik qadam bhī ai yaar ghar se niklā

chhoḌā na jab garebāñ dast-e-junūñ ne merā

tab chiir kar maiñ us ko nā-chār ghar se niklā

rauzan se us ne uupar mujh ko khaḌe jo dekhā

khañkhār kar vahīñ vo ayyār ghar se niklā

us but ke dekhne ko kar tark dīn-o-īmāñ

maiñ Daal kar gale meñ zunnār ghar se niklā

chehroñ pa āshiqoñ ke zardī sī phir ga.ī tab

jab bāñdh vo basantī dastār ghar se niklā

logoñ ke ḳhauf se phir kal shab ko merī ḳhātir

lāchār phāñd kar vo dīvār ghar se niklā

vo shāh-e-husn mere is mulk-e-dil pe yaaro

jis dam ki dauḌne ko yalġhār ghar se niklā

khol aah kā alam aur le ashk ke qashoñ ko

yuuñ maiñ bhī ho ke is dam tayyār ghar se niklā

kuchh to asar kiyā hai dil kī tire kashish ne

paḌhtā jo vo 'sulaimān' ash.ār ghar se niklā

jab tegh ko pakaD wo KHunKHar ghar se nikla

tab main bhi jaan se ho bezar ghar se nikla

har mu-kamar ke sau sau bal paD gae kamar mein

paTka jo bandh kar wo bal-dar ghar se nikla

kushte ko tere dar se afsos le gae kal

aur tu na ek qadam bhi ai yar ghar se nikla

chhoDa na jab gareban dast-e-junun ne mera

tab chir kar main us ko na-chaar ghar se nikla

rauzan se us ne upar mujh ko khaDe jo dekha

khankhaar kar wahin wo ayyar ghar se nikla

us but ke dekhne ko kar tark din-o-iman

main Dal kar gale mein zunnar ghar se nikla

chehron pa aashiqon ke zardi si phir gai tab

jab bandh wo basanti dastar ghar se nikla

logon ke KHauf se phir kal shab ko meri KHatir

lachaar phand kar wo diwar ghar se nikla

wo shah-e-husn mere is mulk-e-dil pe yaro

jis dam ki dauDne ko yalghaar ghar se nikla

khol aah ka alam aur le ashk ke qashon ko

yun main bhi ho ke is dam tayyar ghar se nikla

kuchh to asar kiya hai dil ki tere kashish ne

paDhta jo wo 'sulaiman' ashaar ghar se nikla